२०८१ जेठ ३१ गते १५:३० 
३१ जेठ, काठमाडौं । बागमती प्रदेशका जयस्नु महर्जनले यु–१५ विद्यालय खेलकुदको टेबल टेनिसमा बिहीबार ३ स्वर्ण जितेका छन् ।
जयस्नुले आफूले प्रतिस्पर्धा गरेको तीनवटै विधा ब्वाइज सिंगल्स, डबल्स र मिक्स डबल्समा स्वर्ण जितेका हुन् ।
पोखरा रंगशालास्थित कभर्डहलमा बिहीबार भएको ब्वाइज सिंगल्सको फाइनलमा जयस्नुले कोशीका सुशान्त मेहतालाई ८–११, ११–५, ११–२, ११–६ को सेटमा पराजित गरे । कोशीका गौतम तामाङ र लुम्बिनीका सुविन क्षेत्री संयुक्त रुपमा तेस्रो भए ।
गर्ल्स सिंगल्समा बागमतीकी नर्मदा खाइतु च्याम्पियन बनिन् । उपाधि भिडन्तमा नर्मदाले कोशीकी सुलेखा ठाकुरलाई ११–९, ४–११, ११–५, १३–११ को सेटमा हराइन् । बागमतीका सुरम्य शाक्य र अर्शना महर्जन संयुक्त रुपमा तेस्रो भए ।
टेबलटेनिसमा बागमतीले स्वर्णमा ‘क्लिन स्वीप’ गरेको छ । ५ स्पर्धा समावेश टेबलटेनिसमा बागमतीले पाँचै स्वर्ण जित्न सफल भयो । दोस्रो तथा अन्तिम दिन २ स्वर्ण जितेको बागमतीले पहिलो दिन ३ स्वर्ण जितेको थियो ।
विजेतालाई प्रदेश खेलकुद परिषद्, गण्डकीका सदस्य–सचिव श्रीधर शर्मा र टेबलटेनिसका मुख्य प्रशिक्षक राजेन्द्र कपालीले पुरस्कृत गरे ।
दुईदिने प्रतियोगितामा सातै प्रदेशबाट समान २८–२८ ब्वाइज-गर्ल्स गरी ५६ खेलाडी सहभागी थिए ।
प्रतिक्रिया 4