भक्तपुर नगरपालिकाले किसानलाई कृषि ऋणको व्यवस्था गर्ने

७ असार, काठमाडौं । भक्तपुर नगरपालिकाले किसानका लागि कृषि ऋणको व्यवस्था गर्ने भएको छ ।

नगरपालिकाले आगामी आर्थिक वर्ष २०८१/८२ को नीति तथा कार्यक्रममा कृषक सुविधाका लागि ऋण दिने घोषणा गरेको हो ।

सहुलियत दरमा किसानलाई बिउबिजन वितरण र कृषि चुनको प्रयोगलाई प्राथमिकता दिइने घोषणा पनि नगरपालिकाले गरेको छ ।

वडावडामा रहेका कृषक समूहलाई सक्रिय बनाउने भन्दै नगरपालिकाले स्थानीय प्रजातिका बिउ संरक्षणलाई जोड दिने नीति ल्याएको छ ।

नगरपालिकाद्वारा उत्पादित कम्पोष्ट मल प्रयोग विधिबारे किसानलाई आवश्यक तालिम दिएर कम्पोस्ट मल प्रयोग गर्न प्रोत्साहित गरिने नीति कार्यक्रममा छ ।