अभिक गोल्डेनगेट एसईई कप चेस २०२४ को शीर्षस्थानमा
२०८१ असार ८ गते २२:०६ 
८ असार, काठमाडौं । हिमालयन चेस एकेडेमीको आयोजनामा शनिबार सुरु भएको गोल्डेनगेट एसईई कप २०२४ र्यापिड चेस प्रतियोगिताको पहिलो दिन अभिक शाह ४ अंकसहित शीर्षस्थानमा रहेका छन् ।
जेम्स स्कुलका १८२५ रेटिङका अभिकले गोल्डेनगेट इन्टरनेसनल कलेज, बत्तीसपुतलीमा भइरहेको एसईई कपमा मन्जयकुमार पटेल, विभूषित कायस्थ, तेजश अटल र रोहित श्रेष्ठलाई पराजित गर्दै ४ अंक बनाएका हुन् । शीर्ष वरीयता १९७२ रेटिङका पुरुषोत्तम सिलवालले पनि हरेन्द्रकुमार महतो, स्वीतकराज जोशी, शम्बुहाङ राई र निश्चल अधिकारीलाई पराजित गर्दै अभिकसमान ४ अंक बनाए । तर, समान अंक भएपनि टाइब्रेकरको आधारमा अभिक शीर्षस्थानमा छन् ।
स्वीस प्रणलीको आधारमा सात राउन्डमा आयोजित प्रतियोगिताको पाँचौं चरणमा आइतबार पुरुषोत्तम र अभिक एक आपसमा प्रतिस्पर्धा गर्दैछन् । त्यस्तै, ६ खेलाडीले समान ३ अंक जाडेका छन्, जसमा तेजश, स्वस्तीकराज, निश्चल, विभूषित, रोहित, रोहन खतिवडा, अनुप सिवाकोटी छन् । शम्बुहाङ २ अंक बटुल्दै पहिलो दिन शीर्ष १० मा रहे ।
गर्ल्सतर्फ अंशु दिल प्रजापति २ अंक जोडेर शीर्षस्थानमा छिन् । जेसिका सिंह १ अंकसहित दोस्रो स्थानमा छिन् ।
हिमालयन चेस एकेडेमीको आयोजना तथा गोल्डेनगेट इन्टरनेसनल कलेजको प्रायोजनमा आयोजित एसईई कप सातौं चरणको प्रतिस्पर्धासँगै आइतबार सम्पन्न हुनेछ ।
यसपालि एसईई परीक्षा दिएका खेलाडी सहभागि प्रतियोगिताको विजेताले १० हजार, उपविजेताले ५ हजार र तेस्रो हुनेले ३ हजार रुपियाँसँगै गोल्डेनगेट इन्टरनेसनल कलेजमा छात्रवृत्ति पाउनेछन् । गोल्डेनगेटमा उपलब्ध जुनसुकै विषयमा विजेतालाई शतप्रतिशत, उपविजेतालाई ७५ प्रतिशत र तेस्रो हुने खेलाडीलाई ५० प्रतिशत छात्रवृत्ति दिइनेछ ।
प्रतिक्रिया 4