‘जेरी अनटप’बाट बाहिरिइन् आना, जसिताको इन्ट्री

काठमाडौं । अभिनेत्री जसिता गुरुङ फिल्म ‘जेरी अनटप’को शीर्ष भूमिकामा अनुबन्धित भएकी छन् । निर्माताले उनलाई आना शर्माको ठाउँमा कास्ट गरेका हुन् ।

निर्माता सरोज न्यौपानेले जसितासँग लिखिता सम्झौता भैसकेको बताए । आना अब आफ्नो फिल्मसँग सम्बन्धित नरहेको निर्माता न्यौपानेले बताए । ‘उहाँको ठाउँमा अब जसिता हुनेछिन्’ उनले भनिन् ।

यो फिल्ममा यसअघि अनमोल केसी र आँचल शर्मा अनुबन्धित भैसकेका छन् । ‘फर्की फर्की’पछि अनमोलसँग जसिताको यो दोस्रो सहकार्य हो । यो त्रिकोणात्मक कथावस्तुको फिल्मको छायांकन साउन १ गतेदेखि सुरु हुने तयारी छ ।

काठमाडौं, लुक्ला र मुस्ताङमा छायांकन हुने फिल्मलाई सुयोग गुरुङले निर्देशन गर्नेछन् । दीपक भण्डारीसँग मिलेर सरोजले फिल्ममा लगानी गर्न लागेका हुन् ।