एमालेबाट विद्रोह गरेर सही र न्यायोचित काम गर्‍यौँ : माधव नेपाल

१४ असार, काठमाडौं। नेकपा एकीकृत समाजवादीका अध्यक्ष माधवकुमार नेपालले एमालेबाट विद्रोह गरेर न्यायोचित काम गरेको बताएका छन् ।

शुक्रबार पार्टी केन्द्रिय कार्यालयमा आयोजित ‘जनताका नेता नेपाल’ पुस्तक विमोचन कार्यक्रमलाई सम्बोधन गर्दै अध्यक्ष नेपालले नेकपा(एमाले)बाट विद्रोह गर्नुको अर्को कुनै विकल्प नभएको बताएका हुन् ।

उनले भने, ‘एमालेबाट विद्रोह बाहेक अर्को कुनै विकल्प थिएन । विद्रोह गरेर विद्रोह गरेर अत्यन्तै सही र न्यायोचित काम गर्‍यौँ ।’

उनले एमालेबाट विद्रोह गरेर आफूहरुले संविधान बचाएको र राजनीतिक स्थिरता कायम गरेको बताए । उनले आफूहरुले मुलुकलाई सही दिशामा अगाडी बढाउन भूमिका निर्वाह गरेको भन्दै विद्रोह गरेर सही र न्यायोचित काम गरेको बताए ।

”हामीले विद्रोह गरेर संविधान बचायौं। कम्युनिस्ट आन्दोलनलाई जोगायौँ । गलत प्रवृत्तिका विरुद्धमा जुध्यौँ।’ उनले भने ।

उनले एमालेबाट विद्रोह नगरेको भए आफुहरु गल्लीमा भड्किइरहेको अवस्थामा हुने बताए । उनले आफूहरुले आत्मसर्मपण नगरेको बताए ।

अध्यक्ष नेपालले पार्टीले आफ्नो छुट्टै उपस्थिति देखाएको र आफ्नो भुमिकालाई स्थापित गरेको बताए । उनले संसदमा कम सिट आउनासाथ आत्तिनु नपर्ने बताए ।