पेरिस ओलम्पिकमा प्रिन्स दाहालले पाएनन् प्रशिक्षक
२०८१ असार १७ गते १७:१८ 
१७ असार , काठमाडौं । नेपालका ब्याडमिन्टन खेलाडी प्रिन्स दाहालले पेरिस ओलम्पिकमा प्रशिक्षक नपाउने भएका छन् ।
प्रशिक्षकको नाम दर्ता ढिलाइ हुँदा प्रिन्सले ओलम्पिकमा प्रशिक्षक नपाउने स्थिति बनेको नेपाल ओलम्पिक कमिटीले जनाएको छ ।
ओलम्पिक कमिटीका सचिव सुजनलाल श्रेष्ठले नेपालबाट प्रशिक्षक उपलब्ध नभएपछि प्रिन्सलाई सहयोगका लागि श्रीलंकाली प्रशिक्षक टोनी वाहयुदीलाई आग्रह गरेको बताए । ‘उहाँले नै प्रिन्सलाई ओलम्पिकमा हेरिदिने भन्ने कुरा भएको छ’, उनले भने ।
ओलम्पिकमा छनोट भएपछि प्रिन्सले श्रीलंकामा प्रशिक्षण गरिरहेका छन् । त्यहाँ उनलाई राष्ट्रिय खेलकुद परिषदका प्रशिक्षक सुदीप योञ्जन र श्रीलंकाली राष्ट्रिय टिमका प्रशिक्षक वाहयुदीले प्रशिक्षण दिएका छन् । ओलम्पिकमा प्रिन्सको प्रशिक्षकको बेन्च भने खाली नै रहनेछ ।
प्रिन्स प्रशिक्षण सकेर १० दिनपछि नेपाल फर्किनेछन् ।
त्यस्तै अन्य दुई खेलाडी स्यान्टु श्रेष्ठ र सन्तोषी श्रेष्ठको पनि प्रशिक्षक दर्ता ढिलाइ भएको छ । यसका कारण उनीहरु दुवैको पनि प्रशिक्षक जाने नजाने टुंगो हालसम्म लागिसकेको छैन ।
‘स्यान्टु पनि अन्तिम समय तिर ओलम्पिक छनोट भएका हुन् । जसले गर्दा हामीले प्रशिक्षकको नाम दर्ता गर्न ढिला भयो । तर सन्तोषी र स्यान्टुको प्रशिक्षकका लागि भने आईओसी (इन्टरनेसनल ओलम्पिक कमिटी)ले केही लचकता देखाउने जस्तो कुरा भइरहेको छ’, श्रेष्ठले भने ।
प्रतिक्रिया 4