युरो २०२४ : उपाधि र गोल्डेन बुट जित्ने कसको सम्भावना बढी ?

२० असार, काठमाडौं । जर्मनीमा जारी युरो २०२४ मा अब ८ टिम बाँकी छन् । २४ टिमबाट सुरु भएको यात्रा समूह चरण र प्रि-क्वाटरफाइनल खेलपछि ८ मा झरेको छ ।

यस्तोमा उपाधि दाबेदार र सर्वाधिक गोलकर्ता को बन्लान् भन्ने चासो बढ्न थालेको छ । अहिलेसम्म हेर्दा घरेलु टोली जर्मनीसँगै स्पेन इंग्ल्याण्ड र फ्रान्स उपाधिको मुख्य दाबेदारको रुपमा छन् ।

अप्टा एनालाइसिसको प्रेडिक्सनअनुसार स्पेनको उपाधि जित्ने सम्भावना १९:४८ प्रतिशत छ । सन् २०१२ मा पछिल्लो पटक युरो जितेको स्पेन कीर्तिमानी चौथो पटक उपाधि जित्ने लक्ष्यमा छ ।

इंग्ल्याण्डको उपाधि जित्ने सम्भावना १८.९८ प्रतिशत छ । सोचेअनुसार प्रदर्शन गर्न नसकेको फ्रान्स तेस्रोमा छ । फ्रान्सको सम्भावना १८.१८  र आयोजक जर्मनीको उपाधि जित्ने सम्भावना १७.१५ छ ।

मंगलबार अष्ट्रियाविरुद्ध २-१ को जित निकालेको टर्कीको सम्भावना ३.४९ प्रतिशत छ ।

 गोल्डेन बुट कसको ?

यस पटक विश्व चर्चित स्टार खेलाडीहरूले युरोमा सोचे अनुसारको प्रदर्शन गर्न सकेका छैनन् । केलिएन एमबाप्पे ह्यारी केनदेखि क्रिस्टियानो रोनाल्डोसम्म गोल गर्न संघर्षरत छन् ।

यस्तोमा सर्वाधिक गोल गर्दै प्रतियोगिताको गोल्डेन बुटको होड खुला नै छ ।

जर्मनीका जमल मुसिएला र नेदरल्याण्ड्सका कवडी गाक्पोले समान ३ गोल गरेका छन् । यस्तै स्लोभाकियाका इभान स्रान्ज र जर्जियाका जर्जेज मिकाउडाट्जेले पनि ३ गोल नै गरेका थिए । तर पछिल्ला दुई खेलाडीको युरो यात्रा समाप्त भइसकेको छ ।

जारी युरोमा स्रान्सको अट्याकिङ तथ्याङ्क गज्जबको छ । यूइएफएको रेकर्डअनुसार उनले ५ अटेम्पमै ३ गोल गरेका थिए ।

बेलिङघमलाई अवसर

अब क्वाटरफनइका खेलहरू बलिया टिमबीच हुँदैछ । स्पेन र जर्मनी एक आपसमा भिड्दैछन् भने टर्कीले नेदरल्याण्ड्ससँग खेल्नेछ । यस्तोमा एक खेलाडीका लागि अवसर बन्न सक्छ । इंग्ल्याण्डका जुड बेलिङघम सर्वाधिक गोलकर्ता बन्नका लागि डार्क हर्सको रुपमा छन् ।

स्लोभाकिया विरुद्ध अन्तिम १६ मा हार नजिक पुगेका बेला इंग्ल्याण्डलाई उनै बेलिङघमले उद्दार गरेका थिए । उनले इन्जुरी टाइममा गोल गर्दै खेल बराबरी गरेका थिए । पछि अतिरिक्त सममया ह्यारी केनले गोल गर्दै इंग्ल्याण्डलाई जित दिलाए ।

बेलिङघमबाहेक जर्मनीकै मुसिएला वा काई हाभार्ट्ज गोल्डेन बुटको रेसमा छन् । हाभार्ट्जले २ गोल गरेका छन् । यस्तै वैकल्पिक खेलाडीको रुपमा खेल्न सक्ने निकलस फुलक्रगले पनि २ गोल नै गरेका छन् ।

तर दुर्भाग्यवश जर्मन अट्याकरले अब स्पेनसँग खेल्दैछ । स्पेनले जारी युरोमा जम्मा १ गोल मात्र बेहोरेको छ र अप्टाको अनुसार फ्रान्ससँगै स्पेनको डिफेन्स उत्कृष्ट छ ।

यस्तै युरो २०२४ मा गोल गर्न नसकेका पोर्चुगलका क्रिस्टियानो रोनाल्डो यसलाई सुधार गर्न चाहन्छन् । उनले चार खेलमा २० सट हाने पनि गोल गर्न सकेका छैनन् ।