युरो कपमा हेभिवेट क्वाटरफाइनल : आज जर्मनी र स्पेन तथा पोर्चुगल र फ्रान्स भिड्दै
२०८१ असार २१ गते ७:५६ 
२१ असार, काठमाडौं । युरो २०२४ मा आजदेखि सुरु हुने क्वाटरफाइनलका खेलमा उपाधि दाबेदार टोलीहरुबीच प्रतिस्पर्धा हुँदैछ ।
पहिलो क्वाटरफाइनलमा आयोजक जर्मनीले स्पेनसँग प्रतिस्पर्धा गर्नेछ भने दोस्रो क्वाटरफाइनल खेल पोर्चुगल र फ्रान्सबीच हुनेछ ।
स्पेन र जर्मनी बीचको खेल राति ९:४५ बजे तथा पोर्चुगल र फ्रान्सबीचको खेल मध्यराति १२:४५ बजे सुरु हुनेछ ।
चारै टोली पूर्व च्याम्पियन हुन् । आजको खेलपछि दुई दाबेदार टोली बाहिरिने छन् । त्यसैले पनि क्वाटरफाइनलका खेल प्रतिस्पर्धात्मक हुने अपेक्षा छ ।
स्पेन र जर्मनी युरोको सर्वाधिक सफल टोली हुन् । दुवैले समान ३ पटक युरो जितेका छन् ।
जर्मनीले प्रिक्वाटरफाइनलमा डेनमार्कलाई पराजित गरेको थियो । यस्तै स्पेनले जर्यालाई पराजित गर्दै क्वाटरफाइनलमा स्थान बनाएको हो ।
यस पटक स्पेन र जर्मनी दुवै टोली लयमा देखिएका छन् । दुवै टोली जित निकाल्दै सेमिफाइनल पुग्ने लक्ष्यमा छन् । तर एक टोलीको मात्र लक्ष्य पूरा हुनेछ ।
युवा खेलाडीहरुमा नजर
स्पेनले सन् २००० यता दुई पटक युरो जितिसकेको छ । २००८ र २०१२ मा स्पेनले युरो जितेको थियो । स्पेनले १९६४ मा पहिलो पटक युरो जितेको थियो ।
जर्मनीले युरो जित्न नसकेको २८ वर्ष भइसकेको छ । सन् १९७२ मा पहिलो पटक युरो जितेको जर्मनीले त्यसपछि १९८० र पछिल्लो पटक १९९६ मा उपाधि जितेको थियो ।
स्पेन र जर्मनी भिड्दा दुवै टिमका युवा खेलाडीहरुमा नजर हुनेछ । स्पेनका फरवार्ड लामिन यामल र निको विलियम्स तथा जर्मनीका जमाल मुसिएलाले उत्कृष्ट प्रदर्शन गरिरहेका छन् ।
यस्तै दोस्रो क्वाटरफाइनलमा पोर्चुगल र फ्रान्सबीच खेल हुनेछ । यो खेल पनि दुई पूर्व विजेता बीचको प्रतिस्पर्धा हुनेछ । फ्रान्सले सन् १९८४ र २००० मा उपाधि जितेको थियो । पोर्चुगलले भने सन् २०१६ मा फ्रान्समै भएको युरोमा फ्रान्सलाई हराएर पहिलो पटक उपाधि जितेको थियो ।
यस पटक फ्रान्सले सोचे अनुसारको प्रदर्शन गर्न सकेको छैन । यस्तै पोर्चुगलले पनि औसत प्रदर्शन गरिरहेको छ ।
पोर्चुगलका कप्तान क्रिस्टियानो रोनाल्डो सम्भवत आफ्नो अन्तिम युरो खेलिरहेका छन् । युरोमा सर्वाधिक खेल खेल्ने र गोल गर्ने कीर्तिमान बनाएका रोनाल्डोले यस पटक भने अपेक्षा अनुसार खेल्न सकेका छैनन् ।
उता फ्रान्सका कप्तान केलिएन एमबाप्पेको प्रदर्शन पनि अपेक्षा अनुसार हुन सकेको छैन । दुवै टोलीमा राम्रा खेलाडी भए पनि मैदानमा त्यो प्रदर्शन देखिएको छैन ।
फ्रान्स र पोर्चुगल दुवैले अन्तिम १६ को खेलमा भाग्यमानी बन्दै जित निकालेका थिए । फ्रान्सले खेलको अन्त्यतिर आत्मघाती गोल मद्दतमा बेल्जियमलाई १-० ले पराजित गरेको थियो ।
यस्तै पोर्चुगलले स्लोभेनियालाई पेनाल्टी सुटआउटमा ३-० ले पराजित गरेको थियो, जहाँ पोर्चुगलका डिएगो कोस्टाले तीन पेनाल्टी बचाएका थिए ।
प्रतिक्रिया 4