२०८१ असार ३० गते ८:२५ 
३० असार, काठमाडौं । मिनी विश्वकपको रुपमा रहेको युरो २०२४ को फाइनल खेल आज राति हुँदैछ । फाइनल खेल मध्यराति १२:४५ बजे बर्लिनस्थित ओलम्पिक स्टेडियममा हुनेछ ।
२४ टोलीले सुरु गरेको यात्रामा अब स्पेन र इंग्ल्याण्ड दुई टोलीमात्र उपाधि होडमा छन् । यी दुई मध्ये एकले जर्मनीको बर्लिनमा युरोको ट्रफी उचाल्ने छ ।
उपाधि दाबेदारकै रुपमा दुई टोली फाइनल पुगेकाले खेल प्रतिस्पर्धात्मक हुने अपेक्षा गरिएको छ । स्पेनले सेमिफाइनलमा बलियो डिफेन्स भएको फ्रान्स र इंग्ल्याण्डले नेदरल्याण्ड्सलाई पराजित गरेर फाइनल भेट पक्का गरेका हुन् ।
स्पेनले यस युरोमा उत्कृष्ट लय कायम राख्दै फाइनलसम्मको यात्रा तय गर्दा सबै खेल जितेको छ । उता इंग्ल्याण्ड भने अन्तिम समयमा नतिजा उल्टाउँदै संघर्ष गरेर फाइनलसम्म पुगेको हो ।
इतिहास रच्ने अवसर
यी दुई टोली मध्ये फाइनल जसले जिते पनि इतिहास रच्ने छ ।
स्पेनले जर्मनीसँगै अहिलेसम्म सर्वाधिक ३ पटक उपाधि जितेको छ र चौथो पटक जित्ने लक्ष्यमा छ । यदि स्पेन विजयी भएमा युरो चार पटक जित्ने पहिलो टोली बन्नेछ र सर्वाधिक सफल टोली बन्नेछ ।
स्पेनले सन् १९६४ को दोस्रो संस्करणमै उपाधि जितेको थियो भने सन् २००८ र २०१२ मा लगातार उपाधि जितेको थियो । युरो लगातार जित्दा स्पेनले सन् २०१० मा फिफा विश्वकप समेत जितेको थियो ।
इंग्ल्याण्डले भने अहिलेसम्म युरो उपाधि जित्न सकेको छैन । पछिल्लो पटक सन् २०२० को युरोमा फाइनल पुगे पनि इंग्ल्याण्ड घरेलु मैदान वेम्बलीमा इटलीसँग पेनाल्टी सुटआउटमा पराजित हुँदै उपविजेता बनेको थियो ।
इंग्ल्याण्ड लगातार दोस्रो पटक युरो फाइनल खेल्दैछ । इंग्ल्याण्ड विजयी भएमा पहिलो पटक युरो च्याम्पियन बन्नेछ । त्यसका लागि इंग्ल्याण्डले घर बाहिर उत्कृष्ट प्रदर्शन गर्दै स्पेनलाई हराउनुपर्नेछ ।
इंग्ल्याण्डले अहिलेसम्म जितेको एक मात्र ठूलो उपाधि सन् १९६६ को फिफा विश्वकप हो र त्यो पनि घरेलु मैदानमा जितेको थियो ।
स्पेन र इंग्ल्याण्ड एकआपसमा भिड्दा केही खेलाडीमाथि नजर रहनेछ । जो व्यक्तिगत अवार्डको होडमा पनि छन् । इंग्ल्याण्डका कप्तान ह्यारी केन र स्पेनका डाद्दी ओल्मो सर्वाधिक गोलकर्ता बन्ने होडमा छन् । दुवैले समान ३ गोल गरेका छन् । फाइनलमा गोल गर्ने खेलाडी सर्वाधिक गोलकर्ताको दाबेदार बन्नेछ ।
यस्तै उत्कृष्ट खेलाडी बन्ने दौडमा स्पेनका रोड्रि र इंग्ल्याण्डका जुड बेलिङघम छन् ।
लामिन यामलमाथि नजर
तर फाइनलमा नजर भने एक दिनअघि मात्रै १७औं जन्मदिन मनाएका लामिन यामलमाथि हुनेछ । यी टिनएज स्टारले युरोमा गज्जबको प्रदर्शन गर्दै सबैलाई छायामा मात्र पारेनन् स्पेनलाई फाइनल पुर्याउन पनि उत्कृष्ट योगदान गरिरहेका छन् । सेमिफाइनलमा फ्रान्स विरुद्ध एक गोलले पछि पर्दा उनै यामलले सानदार गोल गर्दै खेल बराबरी गरेका थिए ।
उनले युरोमा विभिन्न कीर्तिमान समेत बनाइसकेका छन् । युरो खेल्ने युरोमा गोल गर्ने सबैभन्दा युवा खेलाडी बनेका यामल अब अरु कीर्तिमानको बाटोमा छन् । उनले फाइनलमा गोल गरेमा युरो फाइनलमा गोल गर्ने कान्छो खेलाडी पनि बन्नेछन् ।
स्पेन र इंग्ल्याण्डको फाइनल यात्रा
स्पेन
- समूह बी को विजेता
- क्रोएसिया विरुद्ध ३-० ले विजयी
- इटली विरुद्ध १-० ले विजयी
- अल्वानिया विरुद्ध १-० ले विजयी
- अन्तिम १६ मा जर्जिया विरुद्ध ४-१ ले विजयी
- क्वाटरफाइनलमा जर्मनी विरुद्ध २-१ ले विजयी
- सेमिफाइनलमा फ्रान्सविरुद्ध २-१ ले विजयी
- हेर्नलायक खेलाडी : लामिन यामल
- सर्वाधिक गोलकर्ता : डानी ओल्मो ३ गोल
- उत्कृष्ट नतिजा : १९६४, २००८ र २०१२ मा विजेता
- २०२० को नतिजा : सेमिफाइनलमा इटलीसँग पेनाल्टीसुटआउटमा ४-२ ले पराजित
इंग्ल्याण्ड
- समूह सी को विजेता
- सर्विया विरुद्ध १-० ले विजयी
- डेनमार्क विरुद्ध १-१ को बराबरी
- स्लोभाकिया विरुद्ध गोलरहित बराबरी
- प्रिक्वाटरफाइनलमा स्लोभेनिया विरुद्ध २-१ ले विजयी
- क्वाटरफाइनल स्वीट्जरल्याण्ड विरुद्ध पेनाल्टीसुटआउटमा ५-३ ले विजयी
- सेमिफाइनलमा नेदरल्याण्ड्सविरुद्ध २-१ ले विजयी
- हेर्न लायक खेलाडी : कोल पाल्मर
- सर्वाधिक गोलकर्ता : ह्यारी केन ३ गोल
- उत्कृष्ट नतिजा उपविजेता : २०२०
- युरो २०२० नतिजा : फाइनलमा पेनाल्टीसुटआउटमा इटलीसँग ३-२ ले पराजित ।
अहिलेसम्मका विजेता
फिफा विश्वकपपछि सबैभन्दा ठूलो फुटबल प्रतियोगिता मानिने युरोको यो १७औं संस्करण हो ।
अहिलेसम्म भएका १६ संस्करणमध्ये जर्मनी र स्पेनले सर्वाधिक ३-३ पटक उपाधि जितेका छन् । यस्तै अहिलेसम्म चार राष्ट्रले मात्र एक भन्दा बढी पटक युरो जितेका छन् भने कूल १० राष्ट्रले युरो जितेका छन् । जसमा जर्मनी (पश्चिम जर्मनीहसित) र स्पेनले सर्वाधिक तीन/तीन पटक तथा फ्रान्स र इटलीले दुई/दुई पटक उपाधि जितेका छन् ।
यस्तै सोभियत युनियन, चेक रिपब्लिक, नेदरल्याण्ड्स, डेनमार्क, ग्रीस र पोर्चुगलले समान एक पटक युरो ट्रफी उचालेका छन् ।
यी हुन् अहिलेसम्मको १६ संस्करणका युरो विजेता
१९६० : सोभियत संघ
१९६४ : स्पेन
१९६८ : इटली
१९७२ : पश्चिम जर्मनी
१९७६ : चेकोस्लोभाकिया
१९८० : पश्चिम जर्मनी
१९८४ : फ्रान्स
१९८८ : नेदरल्याण्ड्स
१९९२ : डेनमार्क
१९९६ : जर्मनी
२००० : फ्रान्स
२००४ : ग्रीस
२००८ : स्पेन
२०१२ : स्पेन
२०१६ : पोर्चुगल
२०२० : इटली
२०२४ : ?
प्रतिक्रिया 4