‘तेलभिसा’को छायांकन सकियो, मेयर रेनु दाहाल भन्छिन्- फिल्म हेर्न उत्सुक छु

काठमाडौं । अभिनेता विपिन कार्की र अभिनेत्री वर्षा राउतले आफ्नो पछिल्लो फिल्म ‘तेलभिसा’को छायांकन सकेका छन् । ३५ औं दिनमा चितवनमा छायांकन टुंगिएको हो ।

इन्डकल्याप समारोहमा भरतपुरकी मेयर रेनु दाहाल पनि उपस्थित रहिन् । आफ्नो नगर क्षेत्रमा छायांकन गरेकोमा निर्माण टोलीलाई धन्यवाद दिंदै उनले फिल्मको सफलताको कामना समेत गरिन् ।

फिल्मले गहन विषयवस्तुको उठान गरेकाले हेर्न आफू उत्सुक रहेको समेत उनले बताइन् । शंकर घिमिरे निर्देशित यो फिल्मको ७० प्रतिशत छायांकन अमेरिका र बाँकी चितवनमा गरिएको हो ।

यो फिल्मबाट निर्देशक घिमिरे दशकपछि फर्किएका हुन् । यसअघि उनले ‘विष’, ‘वीरताको चिनो’, ‘ब्रेकफेल’ र ‘तुलसी’ लगायतका फिल्मको निर्माण तथा निर्देशन गरेका थिए । फिल्ममा अभिनेता कार्की पहिलोपटक दोहोरो भूमिकामा देखिएका छन् ।

फिल्ममा कार्कीको जवान र वृद्ध दुई उमेरको चरित्र चित्रणलाई दर्शकले हेर्न पाउनेछन् । मंसिर ७ गतेदेखि प्रदर्शनको तयारीमा रहेको फिल्ममा ऋचा घिमिरे, पूजा चन्द र बुद्धि तामाङको पनि शीर्ष भूमिका छ ।

वेलडन क्रियसनको ब्यानरमा ऋचा घिमिरेको प्रस्तुति रहेको फिल्ममा अनिल पाण्डे र शिवराज कार्कीको लगानी छ । प्रिन्स युवराज कार्की र श्रुति दाहाल कार्यकारी निर्माता रहेको फिल्ममा सुसन प्रजापतिको छायांकन, रामजी लामिछाने र शिशिर खातीको कोरियोग्राफी, आशिष अविरल, कल्याण सिंह र कृष्ण भारद्वाजको संगीत, विजय बस्यालको पोस्टर डिजाइन र अजय खड्काको सम्पादन रहनेछ ।