राष्ट्रसंघीय आर्थिक तथा सामाजिक परिषदको उपाध्यक्षमा नेपाल निर्वाचित

११ साउन, काठमाडौं । संयुक्त राष्ट्रसंघीय आर्थिक तथा सामाजिक परिषद्(इकोसक)को एसिया–प्रशान्त क्षेत्रको उपाध्यक्ष पदमा नेपाल निर्वाचित भएको छ ।

इकोसकको अध्यक्षमा क्यानडा निर्वाचित हुँदा नेपाल उपाध्यक्ष निर्वाचित भएको संयुक्त राष्ट्रसंघीय सूचना केन्द्रले जनाएको छ ।

इकोसक राष्ट्रसंघका प्रमुख ६ अंग मध्येको एक निकाय हो । आगामी वर्ष नेपाल एसिया–प्रशान्त क्षेत्रको अध्यक्ष हुनेछ ।

५४ सदस्यीय इकोसमा नेपालको नेतृत्व संयुक्त राष्ट्रसंघका लागि नेपालका स्थायी प्रतिनिधि लोकबहादुर थापाले गर्नेछन् । राजदूत थापाले दिगो विकासका लक्ष्य हासिल गर्ने दिशामा परिषद्को कार्यादेशअनुसार सबै सदस्य राष्ट्रसँग निकट सम्पर्कमा रहेर काम गर्ने प्रतिबद्धता व्यक्त गरेका छन् ।

इकोसकमा नेपालसँगै पोल्याण्ड र कोष्टारिका पनि उपाध्यक्ष निर्वाचित भएका छन् । पूर्वी युरोपेली देशबाट पोल्याण्ड र ल्याटिन अमेरिका एवं क्यारेबियन मुलुकहरूबाट कोष्टारिका चुनिएका छन् ।