शेख हसिनाले देश छाडेपछि बंगाली सेलिब्रेटी के भन्छन् ?

काठमाडौं । शेख हसिनाले प्रधानमन्त्री पदबाट राजीनामा दिएर देशबाट भागेपछि बंगलादेशी सेलिब्रेटीहरुले सामाजिक सञ्जालमा विभिन्न प्रतिक्रिया दिइरहेका छन् । उनीहरुको पोस्टले एकैसाथ राहत, आनन्द र भविष्यका लागि आशाको मिश्रण झल्काउँछ ।

प्रसिद्ध फिल्म निर्देशक मोस्तफा सरवर फारुकी लेख्छन्, ‘जुलाई ६ मा स्वतन्त्र देशमा स्वागत छ । देशको स्वतन्त्रताकी शिल्पकारकी छोरी शेख हसिना कसरी देशको इतिहासमा सबैभन्दा खराब र क्रूर तानाशाह बनिन्, यो कुरा विद्यार्थीले पढ्नेछन् र भविष्यमा राजनीतिज्ञले पाठ सिक्नेछन् ।’

निर्देशक अस्फाक निपुनले भनेका छन्, ‘श्रीमती शेख हसिना, देश तपाईंको बुबाको एक्लो होइन, देश हाम्रो पनि हो जो देश छोडेर जाँदैनन्, अल्लाह हाफिज । एक गर्विलो बंगलादेशी ।’

अर्को पोस्टमा उनले लेखेका छन्, ‘बंगलादेश तानाशाह र हत्यारा शेख हसिनाको लामो तानाशाहबाट मुक्त भएको छ । यो सम्भव बनाएकोमा कोटा सुधारको माग गर्दै आन्दोलनमा उत्रिएका विद्यार्थी र मेरो देशका जनतालाई धन्यवाद । यो त सुरुवात मात्र हो । हामी हाम्रो सुधार गर्नेछौं । मातृभूमि ।’

फिल्म अभिनेता सियाम अहमदले आफ्नो प्रतिक्रिया छोटो तर प्रभावशाली रुपमा लेखेका छन्– ‘बंगलादेश २.० ।’

सामाजिक सञ्जाल सेलिब्रेटी सलमान मोहम्मद मुक्तादिरले आफ्नो प्रोफाइल तस्वीरलाई ‘स्वाधीन’ (स्वतन्त्र) शब्दको साथ परिवर्तन गरेका छन् । युवापुस्ताप्रति कृतज्ञता व्यक्त गर्दै उनी लेख्छन्, ‘जेन–जीले हामी सबैलाई यस पृथ्वीमा हुनसक्ने सबैभन्दा राक्षसी अमानवीय तानाशाहबाट बचाएको छ । उनीहरूले विश्व र अन्य देशले गर्न सक्ने काम गरेका छन् । यसले हामी सबैलाई हाम्रो जीवनप्रति ऋणी बनाउँछ । म जेन–जीलाई सलाम गर्छु ।’

अभिनेत्री सादिया अयमनले आफ्नो खुसी व्यक्त गर्दै भनिन्, ‘स्वतन्त्रताको खुसी चारैतिर छ । आहा, शान्ति ! यो मीठो छ !’

अहिले सेलिब्रेटीका पोस्टहरु बंगलादेशको सोसल मिडियामा धेरै पढिएका र सुनिएका पनि छन् । ‘बंगला सिनेमा’ भनिने बंगलादेशको फिल्म र संगीत उद्योग क्षेत्रीय फिल्मको कारण बढी चर्चामा छ । पछिल्लो समय बंगाली फिल्मले विश्वका चर्चित फिल्म फेस्टिभलमा दबदबा जमाइरहेका छन् ।