पत्रकार महासंघको निर्वाचन सुनिश्चित गर्न प्रेस युनियनको आग्रह

२७ साउन, काठमाडौं। नेपाल पत्रकार महासंघको निर्वाचन सुनिश्चित गर्न नेपाल प्रेस युनियनले आग्रह गरेको छ । धुलीखेलमा बसेको प्रेस युनियन केन्द्रीय कार्यसम्पादन समिति बैठकले यस्तो आग्रह गरेको हो ।

प्रेस युनियन महासचिव दिपीप पौडेलले जारी गरेको विज्ञप्तिमा भनिएको छ, ‘नेपाल पत्रकार महासंघको निर्वाचनमा देखिएको ढिलाइप्रति नेपाल प्रेस युनियनको गम्भीर चासो रहेको छ । सदस्यतासम्बन्धी विवाद टुंग्याएर निर्वाचनमा देखिएको अन्योल हटाई पत्रकार महासंघको निर्वाचन सुनिश्चित गर्न युनियन आग्रह गर्दछ ।’

क्रियाशील पत्रकार तथा पत्रकारसम्बद्ध संस्थालाई समेटेर पत्रकार महासंघको निर्वाचनमा नेतृत्वदायी भूमिका लिएर अघि बढ्ने युनियनको केन्द्रीय कार्यसम्पादन समिति बैठकले निर्णय गरेको छ ।

साथै युनियनले श्रमजीवी पत्रकार ऐन कार्यान्वयन गर्न पत्रकारलाई नियमित पारिश्रमिक उपलब्ध गराउन र कानुनमा भएको व्यवस्थाअनुसार तलब सुविधा उपलब्ध गराउन सञ्चार प्रतिष्ठानलाई आग्रह गर्ने निर्णय गरेको छ। ।

पत्रकार र पत्रकारिता क्षेत्रका समस्या पहिचान गरी समाधानका लागि पहल गर्न नयाँ पत्रकारसँग प्रेस युनियन अभियान सञ्चालन गर्ने यनियनले निर्णय गरेको छ । ।

प्रेस काउन्सिल नेपालले सार्वजनिक गरेको पत्रपत्रिका वर्गीकरण मूल्यांकन न्यायोचित नभएको र विभेदपूर्ण रहेको युनियनको ठहर छ । यस्तै  पत्रपत्रिकाको वर्गीकरण नतिजामा देखिएको त्रुटि सच्याएर पुनः नतिजा सार्वजनिक गर्न प्रेस काउन्सिल नेपालसँग युनियनले माग गरेको छ ।

यस्तै सञ्चारमाध्यमलाई सरकारले दिँदै आएको लोककल्याणकारी विज्ञापन वितरणलाई व्यवस्थित र पारदर्शी बनाउन सरकारको ध्यानाकर्षण गर्ने युनियनको माग छ।