सहकारी छानबिन विशेष समितिले गर्‍यो दिपेश पुनसँग सोधपुछ

३१ साउन, काठमाडौं। सहकारी संस्था बचत रकम दुरुपयोग संसदीय छानबिन विशेष समितिले सहकारी ठगी प्रकरणमा संलग्न रहेको आरोप लागेका दीपेशकुमार पुनसँग सोधपुछ गरेको छ ।शुक्रबार पुनसँग सोधपसछ गरिएको संसदीय छानबिन विशेष समितिका सभापति सूर्य थापाले जानकारी दिए ।

उनका अनुसार विशेष समितिको कार्यविधिअनुसार विभिन्न सहकारीको वचत दुरुपयोगमा संलग्नका रूपमा आरोपित व्यक्तिहरूमध्ये शुक्रबार सुप्रिम वचत तथा ऋण सहकारी संस्थाका पूर्वसचिव दीपेशकुमार पुनलाई समितिको बैठकमा बोलाएर सोधपुछ गरिएको हो ।

सहकारीको रकम अपचलनबारे छानबिन गरिरहेको संसदीय विशेष समितिले आरोपितसँग सोधपुछ गरिरहेको छ ।

गत जेठ १५ गते प्रतिनिधि सभाले सहकारीको बचत रकम अपचलनसम्बन्धी छानबिन गर्न संसदीय छानबिन समिति गठन गरेको थियो ।

एमालेका सांसद सूर्य थापाको नेतृत्वमा गठित ७ सदस्यीय छानबिन समितिमा एमालेबाट सरिता भुसाल, कांग्रेसबाट ईश्वरीदेवी न्यौपाने र दिलेन्द्र प्रसाद बडू, माओवादी केन्द्रबाट लेखनाथ दाहाल, रास्वपाबाट शिशिर खनाल र राप्रपा ध्रुवबहादुर प्रधान रहेका छन् ।

सुरुमा कांग्रेसका तर्फबाट बन्द्री पाण्डे सदस्य थिए । पाण्डे मन्त्री भएपनि उनको ठाउँमा बडू समितिको सदस्य भएका हुन् ।