![](https://www.onlinekhabar.com/wp-content/uploads/2024/08/Modify-motorcycle.jpg)
२ भदौ, काठमाडौं । मोडिफाई (स्वरुप परिवर्तन) गरेर चलाइएका १४९ वटा मोटरसाइकल कास्की प्रहरीले नियन्त्रणमा लिएर कारबाही अघि बढाएको छ ।
मोडिफाई गरेर हो–हल्ला मच्चाउँदै ध्वनी प्रदुषण गर्ने मोटरसाइकलहरुलाई नियन्त्रणमा लिइएको प्रहरीले जनाएको छ । ३० साउन २०८१ देखि २ भदौसम्म ५ दिनको अवधिमा १४९ थान मोडिफाई गरिएका मोटरसाइकलाई नियन्त्रणमा लिइएको कास्की प्रहरीका प्रमुख एसपी मोहनकुमार थापाले बताए ।
यसबाट करिब २२ लाख राजश्व उठ्ने अनुमान गरिएको छ । पहिलो पटकदेखि चौथो पटकसम्म नियम उल्लंघन गरेकाहरुलाई अहिले पक्राउ गरिएको छ ।
२१ असोज २०८० देखि अभियानकै रुपमा कास्की प्रहरीले कारबाही सुरु गरेको थियो ।सुरुमा २२ वटा मोटरसाइकल नियन्त्रणमा लिएर कारबाही गरिएको थियो । त्यसैगरी १७ फागुन २०८० देखि २० गतेसम्म तीन दिनको अवधिमा ५९ थान मोटरसाइकललाई प्रहरीले कारबाही गरेको थियो ।
पटके कारबाहीमा परेकाहरुलाई यातायात व्यवस्था कार्यालयमा समेत पठाएर थप कारबही गरिएको थियो । त्यतिबेला ८ जना मोटरसाइकल वर्कसप सञ्चालकलाई समेत पक्राउ गरिएको थियो । स्वरुप परिवर्तन नगर्ने शर्तमा सचेतनामुल कार्यक्रम गरेर उनीहरुलाई छाडिएको थियो ।
यो अभियान सञ्चालन गरेदेखि हालसम्म २ हजार ३५ मोटरसाइकल नियन्त्रणमा लिएर कारबाही गरिएको प्रहरीले जनाएको छ । सो क्रममा २९ लाख ८ सय रुपैयाँ राजश्व उठेको छ ।
प्रतिक्रिया 4