गौरा पर्वमा नाराबाजी गर्ने ३ जना धरौटीमा रिहा

१४ भदौ, काठमाडौं। काठमाडौंको टुँडीखेलमा आयोजना गरेको गौरा पर्वमा प्रधानमन्त्री केपी शर्मा ओली र कांग्रेस सभापति शेरबहादुर देउवाविरूद्ध नाराबाजी गर्ने ३ जना युवाहरू धरौटीमा छुटेका छन् ।

कन्चनपुरका दीपक सिंह ठगुन्ना, सुर्खेतका बुद्धराम भनिने गोपिकृष्ण जैसी र अछामका रामबहादुर बुढा जनही ९/९ हजार धरौटीमा रिहा भएका हुन् ।

जिल्ला प्रशासन कार्यालय काठमाडौंको आदेशपछि उनीहरू धरौटी बुझाएर रिहा भएका हुन् ।

भदौ १० गते टुँडीखेलमा गौरा पर्व मनाउने क्रममा प्रधानमन्त्री केपी ओली शर्मा, शेरबहादुर देउवालगायत नेताविरुद्ध उनीहरूले नाराबाजी गरेका थिए । नाराबाजी गरेको आरोपमा उनीहरुलाई सार्वजनिक शान्ति विरुद्दको कसुरमा मुद्दा चलाइएको थियो ।