ईयू, युनिसेफ र जर्मनीबाट नेपालले ५ अर्ब अनुदान लिने

१६ भदौ, काठमाडौं । युरोपेली युनियन (ईयू), जर्मनी र युनिसेफबाट नेपालले ५ अर्ब रुपैयाँ बराबर अनुदान लिने भएको छ ।

गत बिहीबार बसेको मन्त्रिपरिषद् बैठकले ईयूबाट २ करोड ३० लाख युरो र युनिसेफबाट प्राविधिक सहायताका रूपमा २० लाख युरो गरी कुल २ करोड ५० लाख युरो (झन्डै ३ अर्ब ६७ करोड ४७ लाख रुपैयाँ) बराबर अनुदान सहायता स्वीकार गर्ने निर्णय गरेको हो ।

ईयूबाट लिइने अनुदान बहुक्षेत्रीय पोषण योजना सहायता कार्यक्रमको तेस्रो चरणका कार्यक्रम कार्यान्वयनमा खर्च गरिने भएको छ ।

उता, जर्मनी सरकारबाट १ करोड युरो (करिब १ अर्ब ४६ करोड रुपैयाँ) अनुदान समेत स्वीकार गर्ने निर्णय सोही मन्त्रिपरिषद् बैठकले गरेको छ । यो ऊर्जा वितरणको सुदृढीकरणमा खर्च गर्ने योजना छ ।