चन्द्रपुरको लगातार दोस्रो बराबरी

२१ भदौं, काठमाडौं। चन्द्रपुर नगरपालिकाले एन्फा महिला लिगमा लगातार दोस्रो बराबरी खेलेको छ ।

शुक्रबार सातदोबाटोस्थित एन्फा कम्प्लेक्स मैदानमा भएको दिनको पहिलो खेलमा चन्द्रपुर नगरपालिकाले संकटा फुटबल क्लबसँग गोलरहित बराबरी खेलेको हो । लगातार दोस्रो बराबरीपछि चन्दपुरले दुई खेलबाट २ अंक जोडेको छ ।

संकटाले बराबरीपछि पहिलो १ अंक जोडेको छ ।पहिलो पटक लिग खेलिरहेको संकटाले पहिलो खेलमा विभागीय टोली त्रिभुवन आर्मी फुटबल क्लबसँग ४–० ले पराजित भएको थियो ।

शुक्रबार हुने दिनको दोस्रो खेलमा विभागीय टोली नेपाल पुलिस क्लब र सुदूरपश्चिम प्रदेशबीच प्रतिस्पर्धा हुनेछ ।

पुलिसले पहिलो खेलमा अर्को विभागीय टोली एपिएफ क्लबसँग गोलरहित बराबरी खेलेको थियो भने सुदूरपश्चिम बागमती युथ क्लबसँग ५–१ ले पराजित भएको थियो ।