डीएसपीसहित ३ जना नेपालीको विवरण माग्दै इन्टरपोलले किन लेख्यो पत्र ?

२३ भदौ, काठमाडौं । सिंगापुरस्थित अन्तर्राष्ट्रिय अपराध प्रहरी संगठन (इन्टरपोल) को नेसनल कन्ट्रोल ब्यूरो (एनसीबी) ले नेपाल प्रहरीका प्रहरी नायब उपरीक्षक (डीएसपी) सहित ३ जनाको विवरण माग्दै पत्राचार गरेको छ ।

एनसीबी काठमाडौंलाई केहीअघि आएको पत्रमा कालिकोटका ४१ वर्षीय महेन्द्रजंग शाह, कैलालीका हेमबहादुर शाही र कालिकोटका ४४ वर्षीय दिपेन्द्रबहादुर शाहबारे विवरण मागिएको हो ।

प्रहरी प्रधान कार्यालय उच्च स्रोतका अनुसार, एनसीबी सिंगापुरले आतंकवादसँग सम्बन्धित व्यक्ति र समूह अथवा त्यससँग सम्बन्धित लगानीसँग सम्बन्ध भए नभएकोबारे विवरण पत्रमा माग गरिएको थियो । त्यसअनुसार, पृष्ठभूमिसहितको विवरण सिंगापुरलाई पठाइ सकिएको समेत स्रोतले जनाएको छ ।

उनीहरुमध्ये शाही नेपाल प्रहरीका प्रहरी नायब उपरीक्षक (डीएसपी) हुन् । हाल उनी सुदूपश्चिम प्रदेश प्रहरी कार्यालयमा कार्यरत् छन् ।

विवरण माग गरिएकामध्ये महेन्द्रजंगमाथि उग्र इस्लामिक समूह इस्लामिक स्टेट इन इराक एण्ड सिरिया (आईएसआईएस) सँग जोडिएको आरोप यसअघि पनि लागेको थियो । सन् २०१६ मा यही आरोपमा मलेसिया सरकारले उनलाई डिपोर्ट गरेको थियो ।

पछि मलेसियन सरकारको अनुरोधमा उनी काठमाडौं आउने वित्तिकै पक्राउ समेत परेका थिए । तर, ११ दिनपछि कुनै आधार नभेटिएको भन्दै ६ हजार रुपैयाँ धरौटी बुझाएर छुटेका थिए ।

सन् २०१६ सेप्टेम्बर २० मा मलेसिया प्रहरीका इन्स्पेक्टर जनरल खालिद अबु बकारले पत्रकार सम्मेलनमै महेन्द्रजंग आईएसआईएससँग जोडिएको विषयमा छानबिन भइरहेको बताएका थिए ।

त्यसबेला शाहले अन्तर्राष्ट्रिय आतंकवादी संगठनका सदस्यहरुका लागि नक्कली पासपोर्टको व्यवस्था गरिदिएको समेत खुलेको सिंगापुरको दैनिक पत्रिका द स्ट्रेट्स टाइम्सले समाचार लेखेको थियो ।

प्रहरी प्रधान कार्यालयका एक अधिकृतले उनै महेन्द्रजंगसँग सम्बन्ध हुनसक्ने आशंकामा थप दुई जनाको विवरण पनि माग भएको देखिएको बताए ।

विवरण माग भएकामध्ये दिपेन्द्रबहादुरले अनलाइनखबरसँग कुरा गर्दै डीएसपी शाह र आफू मलेसिया, सिंगापुर र थाइल्याण्डकोको भ्रमणमा गएका बेला चिनजानको हिसाबले महेन्द्रजंगसँग भेट्ने प्रयास गरेको बताए ।

‘उनको पृष्ठभूमिबारे हामीलाई थाहा थिएन, एनआरएनएमा पनि उनी आबद्ध थिए । त्यसैले एकैठाउँको भएको हिसाबले फोन गरेर भेटौं भनेका थियौं’, उनले अनलाइनखबरसँग भने, ‘त्यसपछि मेहन्द्रजंगकै गाडीमा चढेकाले हाम्रोबारे विवरण मागिएको हो ।’

त्यसबेला पनि सिंगापुरमा अध्यागमनका अधिकारीहरुले त्यसबारे आफूहरुसँग सोधपुछ गरेको उनले बताए । ‘त्यसबेला पृष्ठभूमिबारे सोध्छौं भनेको थियो, जम्माजम्मी आफ्नै ठाउँका व्यक्तिलाई भेटौं न भन्दा यो पत्र आएको हो’, उनले थपे, ‘पहिले पनि मलेसियामा रहेका राजदूतसँग विवाद हुँदा उनीबारे पत्राचार भएको भन्ने सुनेको थिएँ ।’

महेन्द्रजंग व्यवसाय गरेर बसिरहेकाले उनको कार्यालयमा पनि पुगेको शाहले बताए । ‘तर, उनी त्यहाँ के गर्थे भन्ने थाहा हुने कुरा भएन’, उनले थपे ।

क्वालालम्पुरमा सन् २०१६ जुनमा आईएसआईएसले ग्रिनेड आक्रमण गर्दा ८ जना मानिसहरु घाइते भएका थिए । त्यसपछि आईएसआईएससँग जोडिएका मान्छेहरुबारे मलेसियन प्रहरीले अनुसन्धान तीब्र पारेको थियो ।

डीएसपी शाही भन्छन् : ६ घण्टासम्म अध्यागमन रोकेर सिंगापुर छिर्न नदिई फिर्ता गरेको थियो

१४ दखि २४ जुनसम्मको १० दिनको टुर प्याकेज बनाएर तीन जना साथीहरु थाइल्याण्ड, सिंगापुर र मलेसिया घुमघाम गर्ने योजना बनाएका थियौं । सोही अनुसार टिकट काटिएको थियो ।

पहिल्यैदेखि चिनेका दाई दीपेन्द्र बहादुर शाहसँग कुरा हुँदा घुम्न जाने प्याकेज तयार भएको विषय पनि शेयर गरेको थिएँ । उहाँले हत्तेरीका म पनि जान्थे । मलेसियामा त मेरो भाइ छ । उसले सबै सहयोग गर्छ भनेर महेन्द्रजंग शाहको नाम लिएका थिए । महेन्द्रजंग एनआरएनए मलेसियाको पूर्वअध्यक्ष समेत रहेको उनले नै मलाई बताएका थिए ।

हामी पहिल्यै टिकट काटेकाले १४ जुनमा थाइल्याण्ड उडेका थियौं ।

दीपेन्द्र दाईले १४ जुनका लागि थाइल्याण्डको टिकट नपाएपछि उहाँ सिधै १३ जुनमा मलेसिया जानु भएछ । त्यसपछि उहाँले मलाई मलेसिया बोलाउनु भयो । त्यतिबेलै हो पहिलो पटक महेन्द्रजंगसँग मेरो कुरा भएको हो । त्यतिबेला २ पटक भिडिओ कलमा कुरा भएको थियो ।

म साथीहरुलाई छाडेर थाइल्याण्डबाट सिधैं मलेसिया गएँ । त्यहाँ ३/४ दिन घुमेपछि म त सिंगापुर पनि घुम्न भनेर आएको तिमीहरुले बोलाएपछि घुम्न छाडेर यता आएको छु मलाई सिंगापुर लानु पर्छ नि भनेको थियो ।

महेन्द्रजंगको आफ्नै गाडी भएकाले उनैको गाडीमा घुम्न भनेर हामी निस्केका थियौं । सिंगापुर जाने बेला अध्यागनमा जाँच भयो । हामी सबै जना सँगै थियो । मेरो अध्यागमन जाँच पास भयो । त्यसपछि महेन्द्रजंगको जाँच हुने बेलामा जान मिल्दैन भन्यो ।

हामी सबै एउटै गु्रपका हौं भनेका थियौं । म नेपाल प्रहरीको डीएसपी समेत हुँ भनेको थियो । हामी करिब ५/६ घण्टासम्म अध्यागमनमा रोकियौं । त्यसपछि अध्यागमनले अहिले बाहिर आएको जस्तो कारण देखाउँदै उहाँ सिंगापुर जान मिल्दैन भनेपछि हामीलाई फिर्ता गर्‍याे ।

महेन्द्रजंग को सँग मिलेर के कारोबार गरे/गर्थे भन्ने मलाई थाहा पनि थिएन । यस विषयमा सबै जानकारी प्रहरी हेडक्वार्टरलाई पनि गराइसकेको छु ।