अपराधी श्रीमान् : आफ्नै पत्नीमाथि गराए ७२ जना परपुरुषबाट ९२ पटक बलात्कार !

हालैका दिनमा फ्रान्सको एउटा दर्दनाक समाचारले सनसनी मच्चाएको छ । जस अनुसार ७१ वर्षका डोमिनिक पेलिकोट नामक व्यक्तिले आफ्नी पत्नी गिजेल पेलिकोटमाथि १० वर्षसम्म लगातार परपुरुषबाट बलात्कार गराएको खुलासा भएको छ ।

डोमिनिकले १० वर्षको अवधिमा विभिन्न ७२ जना अपरिचित पुरुषलाई आफ्नो घरमा बोलाएर आफ्नै पत्नी गिजेलमाथि बलात्कार गर्न लगाउँथे । यसरी पीडित गिजेल आफ्नै अपराधी लोग्नेका कारण एक दशकमा ९२ पटक बलात्कृत भइन् ।

उनले पत्नीलाई लगातार लागुऔषध सेवन गराएर अचेत बनाउने गर्दथे, जसका कारण गिजेलर्ला आफूमाथि भएको दुष्कर्मको महसुस नै हुँदैनथ्यो ।

पाप धुरीबाट कराउँछ भनेझैं अन्ततः यो कर्तुतको खुलासा भयो र मुद्दा अदालतसम्म पुग्यो । तर, १० वर्षसम्म नारकीय जीवन बिताएकी गिजेलका दुःख त्यत्तिमा सकिएनन् ।

गिजेलले उक्त मुद्दालाई सार्वजनिक गर्नका लागि पीडितको गोपनीयताको कानुनी अधिकारलाई समेत त्यागेकी थिइन् । नशालु पदार्थको सेवन गराएर यौन हिंसा गरिएका सबै महिलाको तर्फबाट आफूले कानुनी लडाइँ लडेको उनको भनाइ थियो ।

७१ वर्षकी गिजेल पेलिकोट गत सोमबार फ्रान्सको दक्षिणी सहर एविग्ननस्थित अदालतको इजलास कक्षमा प्रवेश गरिन् । उनलाई सहयोग गर्नका लागि उनका तीन जना छोराछोरी पनि त्यहाँ आएका थिए ।

उक्त मुद्दाको पहिलो तीन दिनसम्म उनी आफ्ना वकिलहरुको माध्यमबाटै संवाद गर्दै धेरै हदसम्म मौन रहिन् । तर, बिहिबार भने उनले आफ्ना पतिको भयावहतालाई स्मरण गर्नका लागि आवाज उठाइन् । न्यायाधीश समक्ष उनले भनिन्, ‘यथार्थमा भनुँ भने त्यो मेरा लागि अत्यन्तै डरलाग्दो छ । म ओछ्यानमा अचेत भई लडिरहेकी छु र ममाथि बलात्कार भइरहेको छ । बलात्कारीहरुले मलाई कुनै थोत्रो कपडाको गुडिया ठानिरहेका छन् ।’

प्रतिवादीका वकिलहरुले उनीमाथि अदालतमा केही भद्दा प्रश्नहरु समेत गरे । एक दशकसम्म आफूमाथि बलात्कार भएको कुरा पनि थाहा नहुने कुरा कसरी सम्भव हुन्छ ? भन्ने उनीहरुको प्रश्न थियो । उनको विवाहेत्तर सम्बन्ध रहे नरहेको ? खुल्ला यौन सम्बन्धमा रहे नरहेको ? जस्ता प्रश्नहरू पनि उनीमाथि वर्षाइयो ।

त्यस्ता अपमानजनक प्रश्नहरुको सामना गर्नुपर्दा गिजेललाई केही अप्ठेरो त लाग्यो तर उनी हिम्मत जुटाएर त्यहीँ बसिरहिन् । उनीसँग आएका उनका छोराछोरीहरू भने आमालाई गरेका त्यस्ता प्रश्नहरु सुन्न नसकी इजलास कक्षबाट बाहिरिएका थिए ।

उनको पति डोमिनिक पेलिकोटले without her knowing नामक एक अनलाइन फोरमको माध्यमबाट अपरिचित पुरुषहरुलाई आफ्नी पत्नीमाथि बलात्कार गर्नका लागि भाडामा लिने गर्दथ्यो । अनि घरमै बोलाएर ती पुरुषबाट पत्नीलाई बलात्कार गराउँदै त्यसको भिडियो खिच्दथ्यो ।

कहिलेकाहीँ परपुरुषसँगै आफू पनि पत्नीमाथिको बलात्कारमा सहभागी हुनथ्यो । त्यसरी गिजेलमाथि ९२ पटक बलात्कार भएको र त्यसका २० हजार तस्वीर तथा भिडियोहरु फेला परेको प्रहरीले जनाएको छ । ती फोटो तथा भिडियोलाई डोमिनिकले कम्प्युटरमा abuse नामक फोल्डर बनाएर राखेको थियो ।

गिजेलमाथि सन् २०११ बाट यौनहिंसा सुरु भएको थियो र त्यो १० वर्षसम्म चल्यो । सन् २०२० मा स्कर्टमुनिबाट महिलाको भिडियो खिचेको आरोपमा प्रहरीले डोमिनिकलाई पक्राउ गरेपछि उसको घरमा अनुसन्धान गर्दा उसले आफ्नी पत्नीमाथि त्यस्तो अत्याचार गरिरहेको खुलासा भएको हो । त्यस क्रममा प्रहरीले घरबाट कल्पनै गर्न नसकिने सबूतहरू फेला पारेको थियो । ती फोटो तथा भिडियोहरू हेरेपछि मात्रै गिजेललाई आफूमाथि वर्षौंदेखि बलात्कार भइरहेको थाहा भयो ।

उनीमाथि बलात्कार गर्ने ७२ मध्ये ५१ जना पुरुषको पहिचान भएको छ । उनीहरुमाथि गम्भीर अपराधमा मुद्दा दायर भएको छ ।