पर्सामा राहदानी विना होटलमा बसेका बंगलादेशी नागरिक पक्राउ

२७ भदौ, काठमाडौं। पर्सामा बिना राहदानी बसेका एक जना बंगलादेशी नागरिक पक्राउ परेका छन् ।

जिल्ला प्रहरी कार्यालय, पर्साले बंगलादेशको सिलेट होबीगंज होल्डिङ बस्ने २९ वर्षीय महमद सहादत हुसेनलाई पक्राउ गरेको डीएसपी दिपक भारतीले बताए ।

उनका अनुसार, २६ भदौमा चाडपर्वलाई लक्षित गरेर वीरगञ्जका होटलहरुमा चेकजाँच गर्ने क्रममा उनी विना राहदानी बसेको फेला परेको थियो ।

त्यसक्रममा बसपार्कमा रहेको आर्यन होटल एण्ड लजको कोठा नं. २०२ बाट उनलाई पक्राउ गरिएको भारतीले जनाएका छन् ।

थप अनुसन्धान भइरहेको प्रहरीले जनाएको छ ।