सुरज रानाको ‘जब कविता निस्कन्छ जुलुसमा’ सार्वजनिक

२० असोज, काठमाडौं । कवि सुरज रानाको कविता संग्रह ‘जब कविता निस्कन्छ जुलुसमा’ सार्वजनिक भएको छ ।

बत्तीसपुतलीस्थित शिल्पी थिएटरमा एक कार्यक्रमका बीचका उपसभामुख इन्दिरा रानामगर, कवि श्रवण मुकारुङ, प्रा.डा. विन्दु शर्मा, समीक्षक गणेश खनिया र कवि रानाले संयुक्त रुपमा पुस्तको लोकार्पण गरे ।

लोकार्पण कार्यक्रममा बोल्दै रानाका कविताहरुले आफूलाई असाध्यै छोएको मुकारुङले बताए । उनले भने, ‘सुरजले कवितामार्फत् भन्ने कुराहरुमा व्यंग्य चेत असाध्यै शक्तिशाली छ । सँगै लिम्बुवानको कुरा पनि आएको छ, यो असाध्यै राम्रो कुरा हो ।’

उनले एउटा राम्रो कवि हुनलाई सबै मान्छेका कथा व्यथा लेख्नुपर्ने बताए । यसमा सुरज सफल भएको मुकारुङको भनाइ थियो । त्यस्तै प्रा.डा. शर्माले रानाको कवितामा मौकिलता भएको उल्लेख गरिन् । उनले भनिन्, ‘उहाँका कवितामा मिथक छ, संस्कृति छ, समाज छ । उहाँका कविताहरुले तर्कहरुको श्रंखला प्रस्तुत गरेर पाठकलाई घत पार्ने गर्छन् ।’

लेखक तथा समीक्षक गणेश खनियाँले रानाका कवितामा पहिचानको मुद्दा सशक्त भएर आएको बताए । उनले भने, ‘यो कविता संग्रहमा लिम्बु किराँत मिथहरु छन् । दार्शनिक रुपबाट पनि कविताहरुको उठान भएको छ । लैंगिक चेत पनि छ ।’

एक दशकभन्दा लामो समयदेखि लेखनमा सक्रिय रहेका रानाको यो पहिलो कविता संग्रह हो । यस संग्रहमा ‘ओ बाहुनी’, ‘प्रहरी चौकीमा सोल्टा’, ‘लेस्बियन छाया’, ‘म ब्रह्माण्ड’, ‘जब कविता निस्कन्छ जुलुसमा’ गरी पाँच खण्डमा ४४ कविताहरुलाई विभाजन गरिएको छ । यो कवितासंग्रह सांग्रिला पब्लिकेसनले बजारमा ल्याएको हो ।