दशैंको खानपान : मधुमेहका बिरामीले के कुरामा ध्यान दिने ?

दशैंको स्वादिलो खानेकुराले दशैंलाई रमाइलो बनाउँछ, तर खानपानमा ध्यान नदिंदा चाडपर्वमा दीर्घरोगीलाई थप समस्या हुनसक्छ । अझ मधुमेहको समस्या त झन् खानपानसँग सम्बन्धित हुन्छ । त्यसैले मधुमेहको समस्या भएकाहरूले खानपानमा निकै नै ध्यान पुर्‍याउनुपर्छ ।

हुन त मधुमेहको समस्या भएका व्यक्तिले दशैंमा मात्र हैन, सधैं नै खानपान बार्नुपर्ने हुन्छ । मधुमेहको समस्यामा औषधि खाए पनि खानपानमा ध्यान दिइएन भने औषधिले काम गर्दैन । औषधि खाने तर खानपान नबार्दा सुगर लेबल बढ्छ । त्यसैले खानपान र औषधि दुवैलाई मिलाएर लैजानुपर्छ ।

सामान्य बेलामा भन्दा दशैंको बेला घरमा धेरै काम हुने भएकाले समयमा खाना खाने मेसो भने मिलेको हुँदैन । बिहानको खाना एकैचोटि दिउँसो मात्र खान भ्याइने हुनसक्छ । यस्तोमा धेरै भोक लागेको हुन्छ र एकै पटक धेरै मात्रामा खाना खाइने हुन्छ । जसले सुगर लेबल घटबढ हुनसक्छ । त्यसैले दशैंमा मधुमेहको समस्या भएकाले खाना खाने समयमा एकदमै ध्यान दिनुपर्छ ।

जति नै व्यस्त भए पनि खाना खाने समय छुट्याउनुपर्छ । समयमा खाना खाइएन भने सुगर लेबल डाउन भएर ढल्न नै सकिने हुन्छ । त्यसैले खानपानको समयलाई ध्यान दिनुपर्छ ।

मधुमेहको समस्या भएकाहरूले कति समयमा, कति चोटि र कति मात्रामा खाना खाइयो भन्ने कुराले शरीरमा सुगर लेबल नियन्त्रण गर्न महत्वपूर्ण भूमिका निर्वाह गर्छ ।

दशैंको बेला मधुमेहको समस्या भएका व्यक्तिले गडबड गर्ने भनेको खानाको मात्रामा पनि हो । दशैं हो भनेर धेरै मात्रामा खाना खाने अझ खसीको मासु खाने गर्छन् । खसीको मासुमा धेरै बोसो हुने भएकाले यसले सुगर र प्रेसर बढाउन सक्छ । मासुको साथमा भात, चिउरा र आलुको अचार खाइन्छ यसमा कार्बोहाइड्रेटको मात्रा धेरै हुन्छ यसले पनि सुगर बढाउँछ । त्यसैले यस्ता खानेकुरा थोरै मात्र खानुपर्छ ।

दशैंमा गुलियो पेय पदार्थहरू जस्तै कोक, फ्यान्टा, जुस पनि खाने गरिन्छ यसले पनि सुगरलाई बढाउँछ । यस्ता खानेकुरा त खाँदै नखानु राम्रो हुन्छ । मासु खाँदा खसीको मासु कम खाएर कुखुराको मासु र अण्डा खानु राम्रो हुन्छ ।

मासुको परिकारसँग मैदाले बनेको परिकार जस्तो दालमोठ, चिप्स र तेलमा तारेको फुरन्दाना पनि खाइन्छ, यस्ता खानेकुराबाट पनि टाढै रहनु राम्रो हुन्छ ।

धेरै चिल्लो वा तारेको खानेकुराले पनि सुगरको मात्रा बढाउँछ । त्यसैले मासु तथा अन्य परिकार पकाउँदा कम चिल्लो प्रयोग गर्नु राम्रो हुन्छ । धेरै गुलियो र चिल्लो खानेकुरा कम गरेर अन्य खानेकुरालाई मात्रा मिलाएर दिनको चारदेखि पाँच पटक खाँदा मधुमेहलाई नियन्त्रणमा राख्न सकिन्छ ।

दशैंमा खानपानसँगै बिरामीले शारीरिक व्यायामलाई पनि बढाउनुपर्छ । बेलाबेलामा ग्लुको मिटरले चिनीको मात्रा पनि जाँच गरिरहनुपर्छ ।

यो पनि पढ्नुहोस

दशैंमा सन्तुलित खानपान नगरे पेटमा निम्तिन्छ समस्या (भिडियो)

यो पनि पढ्नुहोस

निरोगी खसी-बोका कसरी छान्ने ?

यो पनि पढ्नुहोस

दशैंका परिकार खाँदा स्वास्थ्यको ख्याल कसरी राख्‍ने ?