दैलेखको आठबीसका महिलालाई नि:शुल्‍क प्याड वितरण र जनचेतना

२४ असोज, काठमाडौं । दैलेखको आठबीस नगरमा महिनावारी सम्बन्धी जनचेतना र महिलाहरूलाई निशुल्क प्याड वितरण गरिएको छ ।

प्याड वितरण अभियानले स्थानीय महिलाहरूलाई महिनावारीका बेला भोग्नुपर्ने चुनौतीहरू र गलत धारणाहरूको बारेमा छलफलपछि निशुल्क रुपमा प्याड वितरण गरेको हो ।

साथै महिलाहरूलाई महिनावारीका क्रममा अपनाउनुपर्ने सरसफाइका मापदण्डहरू, स्वास्थ्य सावधानीहरू, र प्याडको सही प्रयोगको विषयमा जानकारी समेत गराइएको छ ।

कार्यक्रममा महिनावारीलाई लुकाउनुपर्ने वा नकारात्मक रूपमा हेर्ने परम्परागत सोचाइलाई तोड्नुपर्नेमा सरोकारवालाहरूले जोड दिएका थिए ।

कार्यक्रममा सहभागी भएका महिलाहरूले यस्ता सचेतनामूलक कार्यक्रमले महिनावारीका बारेमा भएका पुराना सामाजिक कुरीतिहरू हटाउन सहयोग पुर्‍याउने बताए । उनीहरूले महिनावारीलाई लाजको विषय नभइ यो प्राकृतिक प्रक्रिया भएकाले आफूहरू सचेत भएको भन्‍दै खुसी व्‍यक्त गरेका थिए ।