प्रहरी समायोजन नहुँदा काम देखाउन कठिन: मुख्यमन्त्री सिंह

३० असोज, जनकपुरधाम । मधेशका मुख्यमन्त्री सतिशकुमार सिंहले प्रहरी समायोजन नभएको कारण प्रदेश सरकारको काम कारबाही चाहेजस्तो नभएको बताएका छन् । नेपाल प्रहरीको ६९ औं स्थापना दिवसको अवसरमा मधेश प्रदेश प्रहरी कार्यालयले आयोजना गरेको कार्यक्रमलाई सम्बोधन गर्दै मुख्यमन्त्री सिंहले चाँडो प्रहरी समायोजन गरिदिन संघीय सरकारलाई आग्रह गरे ।

‘प्रहरी अहिलेसम्म समायोजन नभएर सरकारले दिन चाहे जस्तो पर्फरमेन्स दिन सकिएको छैन । सरकारले चाँडै समायोजन टुंग्याउन अनुरोध गर्छु’, उनले भने ।

मुख्यमन्त्री सिंहले साधनस्रोतको हिँसाबले नेपाल प्रहरीले गरिरहेको काम प्रसंशायोग्य रहेको बताए । तर नेपाल भारत खुलासीमाबाट हुने भन्सार छली, तस्करी, बढ्दो अपराध, लागूऔषध ओसारपसार नेपाल प्रहरीका लागि ठूलो चुनौती रहेको मुख्यमन्त्री सिंहको भनाइ छ ।

समायोजन नभएपनि नेपाल प्रहरीलाई मधेश सरकारले विभिन्न तवरबाट सहयोग गरिरहेको बताउँदै उनले अहिलेको तलबभत्तामा प्रहरीको जीवनयापन कठिन रहेको बताए । मधेश प्रदेश प्रहरी प्रमुख लालमणि आचार्यले समाजमा सुरक्षाको प्रत्याभूति र अपराध नियन्त्रण गर्न अहोरात्र खटिरहेको बताए ।