विराज भट्टले रिसाएर पुष्पगुच्छा फ्याँकेको घटना के हो ?

काठमाडौं । विराज भट्ट र छोरा समीर गत साता ‘१२ गाउँ’को हल भिजिटका लागि पश्चिम नेपाल पुगेका थिए । हल-हलमा पुगेर उनीहरुले दर्शकसँग भलाकुसारी मात्र गरेनन्, हल सञ्चालकसँग फिल्मको अवस्थाबारे जानकारी दिए ।

यस्तोमा ‘१२ गाउँ’ प्रवर्धनको लागि नेपालगञ्ज पुगेका विराजको एक भिडियो यतिबेला सामाजिक सञ्जालमा भाइरल बनिरहेको छ । भिडियोमा हजारौं प्रतिक्रिया आएका छन् । यो भिडियोले सकारात्मक र नकारात्मक दुवैथरी प्रतिक्रिया पाइरहेको छ ।

भिडियो फिल्म हलभित्र खिचिएको हो, जहाँ विराज र समीरलाई सोफामा बसेको देख्न सकिन्छ । विराजले आफ्नो स्वागतका लागि हलका कर्मचारीले दिएको पुष्पगुच्छालाई रिसाउँदै टेबुलमा फ्याँकेका छन् । उनलाई भिडियोमा आक्रोशित र असन्तुष्ट पनि देख्न सकिन्छ ।

फिल्म प्रदर्शनको तेस्रो सातासम्म पनि पोस्टर नटाँसिएको भन्दै विराज आक्रोशित भएर फूल फ्याँकेको दाबी भिडियोमा गरिएको छ । यो घटना क्यूएफएक्सको नेपालगञ्ज हलमा भएको हो ।

यसबारे क्यूएफएक्सको नेपालगञ्जकी म्यानेजर स्वीकृति तामाङसँग अनलाइनखबरले घटनाबारे जिज्ञासा राखेको थियो । उनले गत सोमबार सामान्य कुरामा दुवै पक्षबीच मिसअन्डस्ट्यान्डिङ भएको र अहिले कुरा मिलिसकेको बताइन् ।

पोस्टरकै बारेमा असमझदारी भएकोतर्फ उनले संकेत गरिन् । सबै फिल्मले हलमा राम्रो कमाइ गरिरहेको पनि उनले बताइन् । ‘अहिले सबै कुरा मिलेको छ’ उनले भनिन् ।विराजसँग भने सम्पर्क स्थापित हुन सकेन ।

विराज निर्देशित दोस्रो फिल्म ‘१२ गाउँ’ अहिले देशव्यापी प्रदर्शन भइरहेको छ ।