गत साता सेयर बजारमा आकर्षण बन्यो होटल सेक्टर

२० कात्तिक, काठमाडौं । तिहारपछि आज मंगलबारदेखि सेयर बजार खुल्दैछ । तिहारअघि गत साता १.९ प्रतिशत बढेको बजार यो साता जम्मा दुई दिन मात्रै कारोबार हुनेछ । छठ पर्वका कारण बिहीबार सार्वजनिक विदा परेको छ ।

गत साता ५० अंकले बजार बढ्यो । अघिल्लो साता २६२७ अंकमा बन्द भएको बजार गत साता २६७७ अंकमा बन्द भयो । यहीं अंकबाट आजदेखि गणना हुनेछ । गत साता बैंकिङ बाहेक सबै सेक्टर बढेका छन् । बैंकिङ सेक्टर जम्मा १ अंक मात्रै घट्यो ।

गत साता होटल एण्ड टुरिजम सेक्टर भने सबैभन्दा धेरै ७.३ प्रतिशत बढ्यो । साउन २१ गते यो सेक्टरले हालसम्मकै उच्च अंक ७७८० को रेकर्ड बनाएको थियो । त्यसयता यो सेक्टर १२.५ प्रतिशत घटेको छ । हाल होटल समूहको सूचक ६८०३ मा छ ।

गत साता मुख्य: तीन कारणले यस क्षेत्रमा आकर्षण बढेको लगानीकर्ता बताउँछन् । लोक्याप, पर्यटन सिजन सुरु भएसँगै यस क्षेत्रका कम्पनीको वित्तीय विवरण राम्रो आउने अनुमान र गत आर्थिक वर्षसम्मको नाफाबाट राम्रै लाभांश दिने अनुमानले होटल सेक्टरमा आकर्षण देखिएको हो ।

यस सेक्टरमा जम्मा ६ वटा कम्पनी सूचीकृत छन् । तीमध्ये एउटा सिटी होटल मात्रै गत आर्थिक वर्षमा नोक्सानीमा रहेकाले अरुले राम्रै लाभांश दिने अपेक्षा लगानीकर्ताले गरेका छन् । यीमध्ये सोल्टीले हालै २६.८४ प्रतिशत नगद र १० प्रतिशत बोनस सेयर घोषण गरेको छ । कम्पनीको अंकित सेयर मूल्य १० रुपैयाँ हो ।

संख्यात्मक रुपमा न्यून कम्पनी र लोक्याप पनि भएकाले यस सेक्टरको सेयर माग केही बलियो हुनेवित्तिकै सकारात्मक प्रभाव पर्ने गरेको छ ।

गत साता बजारमा समूहगत उतारचढाव