२०८१ कात्तिक २१ गते ८:२६ 
२१ कात्तिक, काठमाडौं । म्यानचेष्टर सिटी युरोपियन च्याम्पियन्स लिगमा पोर्चुगिज क्लब स्पोर्टिङ सिपीसँग ४-१ ले स्तब्ध भएको छ ।
मंगलबार राति घरेलु मैदानमा भिक्टोर ग्योकेरेसले ह्याट्रिक गरेपछि स्पोर्टिङले एक गोलले पछि परेको स्थिति उल्टाएर सानदार जित हात पारेको हो ।
ग्योकेरेसले खेलको ३८, ४९ र ८०औं मिनेटमा गोल गरे । म्याक्सिमिलियानो अरौजोले एक गोल थपेका थिए ।
खेलको चौथो मिनेटमै फिल फोडेनले गोल गर्दै खेलमा अग्रता बनाएका थिए । तर, त्यो अग्रता लामो समय रहेन । ३८औं मिनेटमा स्पोर्टिङका ग्योकेरेसले बराबरी गोल फर्काए ।
दोस्रो हाफको सुरुवात देखि नै स्पोर्टिङले आक्रमक खेल्दै गोल गर्यो । ४६औं मिनेटमा अरौजोले गोल गर्दै अग्रता स्पोर्टिङलाई २-१ को अग्रता दिलाए । त्यसको ३ मिनेटपटि नै ग्योकेरेसले पेनाल्टीमा गोल गरेपछि स्पोर्टिङको अग्रता ३-१ पुग्यो ।
६९औं मिनेटमा एर्लिङ हालान्डले पेनाल्टी मिस गर्दा सिटीले गोल अन्तर कम पार्ने अवसर गुमायो ।
८०औं मिनेटमा स्पोर्टिङले फेरि पेनाल्टी पायो र त्यसमा गोल ग्योकेरेसले ह्याट्रिक गरे ।
सिटीमाथिको जितपछि केही दिनअघि मात्रै म्यानचेष्टर युनाइटेडको प्रशिक्षकमा अनुबन्ध भएका स्पोर्टिङका प्रशिक्षक रुवेन अमोरिमलाई पनि राहत मिलेको छ ।
जितपछि ४ खेलबाट १० अंक जोडेको स्पोर्टिङ अंकतालिकामा दोस्रो स्थानमा उक्लेको छ । सिटी भने समान खेलबाट ७ अंकसहित छैटौं स्थानमा छ ।
प्रतिक्रिया 4