गुणस्तरहीन ३० टन बढी भटमास पैठारीमा रोक

१२ मंसिर, काठमाडौं। खाद्य प्रविधि तथा गुण नियन्त्रण विभाग अन्तर्गतको खाद्य आयात निर्यात गुणस्तर प्रमाणिकरण कार्यालय नेपालगन्जले ३० टनभन्दा बढी भटमासको पैठारीमा रोक लगाएको छ ।

व्यापारीक प्रयोजनका लागि पैठारी गरी भन्सार नाकामा ल्याइएको ३० हजार २५५ के.जी. भट्मास रोडा परीक्षण गर्दा न्यून गुणस्तरको पाइएकोले कार्यालयले उक्त न्यून गुणस्तरको भटमासको कन्साइन्मेन्ट आयात अस्वीकृत गरेको जनाएको छ ।

भन्सार कार्यालयले परीक्षणको लागि भटमासको नमूना खाद्य आयात निर्यात गुणस्तर प्रमाणिकरण कार्यालयमा पठाएको थियो । उक्त भटमासको नमूना परिक्षण गर्दा नेपाल सरकारले निर्धारण गरेको खाद्यान्नको अनिवार्य गुणस्तर मापदण्ड बमोजिम क्षतिग्रस्त दाना तथा जैविक बाह्य पदार्थको मात्रा बढी पाइ प्रतिकूल देखिएकोले आयात गर्न नमिल्ने भन्दै १० मंसिरमा भन्सार कार्यालयलाई प्रतिवेदन पठाएको थियो। सोही प्रतिवेदनको आधारमा पैठारी रोक भएको हो।

खाद्य स्वच्छता तथा गुणस्तर ऐन २०८१ ले अनुसार खाद्य पदार्थको पैठारी गर्दा विभागबाट प्रवेश अनुमति अनिवार्य गरेको छ ।