चिनियाँ विदेशमन्त्रीसँग परराष्ट्रमन्त्रीले भनिन्- नेपालीलाई भिसा निःशुल्क गरेकोमा धन्यवाद

१४ मंसिर, काठमाडौं । परराष्ट्रमन्त्री डा. आरजु राणा देउवाले प्रधानमन्त्री केपी शर्मा ओलीको आसन्न चीन भ्रमणले नेपालसँगको सम्बन्धलाई सुदृढ बनाउँदै लैजाने विश्वास व्यक्त गरेकी छिन् ।

शुक्रबार छेङ्दुमा चिनियाँ विदेशमन्त्री वाङ यीसँगको भेटवार्ताका क्रममा उनले नेपाल चीन सम्बन्धका विविध पक्ष, आपसी हित र साझा चासोका साथै प्रधानमन्त्री केपी शर्मा ओलीको आसन्न चीन भ्रमण लगायतका विषयमा छलफल गरेको उनको सचिवालयले जनाएको छ ।

वार्ताका क्रममा चीनको ७५ औँ स्थापना दिवस र आगामी वर्ष नेपाल चीन कूटनीतिक सम्बन्ध स्थापनाको ७० औँ वार्षिकोत्सवका अवसरमा विदेशमन्त्री वाङमार्फत् चीन सरकार र चिनियाँ नागरिकलाई मन्त्री डा राणाले बधाई ज्ञापन गरेकी थिइन् ।

मन्त्री डा राणाले पछिल्लो समय नेपाल चीन सम्बन्धमा उल्लेखनीय उपलब्धिहरू हासिल भएका र यसका कारण सम्बन्ध थप बलियो बन्दै गएको बताउँदै चीन सरकारले चीन भ्रमण गर्ने नेपाली नागरिकहरूलाई हालै भिसा शुल्क नलाग्ने घोषणा गरेकोमा चीन सरकारलाई धन्यवाद दिइन् ।

त्यसैगरी नेपाल–चीनबीचका सबै परम्परागत सीमा नाका पुनः नियमित रूपमा सञ्चालनमा आइसकेका र त्यहाँ दुवै देशका नागरिक, सामान र सेवाहरूको सीमापार आवागमन निर्वाध बनेकाले यसलाई थप सहज एवं प्रभावकारी बनाउन दुवै पक्षबाट महत्वपूर्ण योगदान पुग्ने विश्वास गरिएको बताइएको छ ।

प्रधानमन्त्री ओली आगामी सोमबार चीनको औपचारिक भ्रमणमा जाँदैछन् । त्यसअघि तयारीका लागि परराष्ट्रमन्त्री राणा हिजो चीन गएकी हुन् ।

यो पनि पढ्नुहोस

चिनियाँ विदेशमन्त्रीसँग पराष्ट्रमन्त्रीको छेङ्दुमा भेट