एनपीएल : पहिलो खेल जितेको जनकपुरविरुद्ध कर्णालीको दाबेदारी

१७ मंसिर, काठमाडौं । नेपाल प्रिमियर लिग एनपीएलको दोस्रो दिनको दोस्रो खेलमा जनकपुर बोल्ट्स र कर्णाली याक्स खेल्दै छन् । खेल दिउँसो सवा १ बजेदेखि सुरू हुनेछ ।

पहिलो खेल जितेको जनकपुर लगातार दोस्रो जितसहित बलियो दाबेदारीलाई कायमै राख्ने लक्ष्यमा हुनेछ भने कर्णालीले पहिलो जित निकाल्दै दाबेदारी प्रस्तुत गर्ने लक्ष्यसहित मैदानमा उत्रने छ ।

जनकपुरका लागि पहिलो खेलमा विदेशी खेलाडीले उत्कृष्ट प्रदर्शन गरेका थिए । आजको खेलमा पनि जनकपुरले जनकपुरको उस्तै साथसहित नेपाली खेलाडीबाट पनि उच्च प्रदर्शनको आशा राख्ने छ । विशेषगरी लाहिरु मिलान्थाले ब्याटिङमा उत्कृष्ट गर्दा क्यानडाका अलराउण्डर हर्श थाकरले ब्याटिङ बलिङ दुवैमा राम्रो प्रदर्शन गरे ।

आजको खेलका लागि न्युजिल्याण्डका जिमी नीशम पनि उपलब्ध भइसकेका छन् । उनले खेलेको खण्डमा जनकपुरले एक विदेशीलाई भने बाहिर राख्नुपर्ने छ । बेन माइकलाई बाहिर राखेर बाँयाहाते ब्याटिङ र दाँयाहाते बलिङका लागि नीशम खेलाउन सक्ने छ भने मिलान्था, थाकर र मोहसिनलाई खेलाउने छ । अन्य परिवर्तन भने जनकपुरले गर्ने सम्भावना देखिँदैन ।

उता पहिलो खेल खेल्न लागेको कर्णालीले विश्वचर्चित शिखर धवनको उपस्थिति र राष्ट्रिय टोलीका दुई स्टार खेलाडी सोमपाल कामी र गुल्शन झाको उच्चतम प्रदर्शनको अपेक्षा राख्न सक्छ । बाबर हायात, जीशान मकसुद र चाडविक वाल्टन पनि खेल्ने पक्कापक्की छ । धवनको आगमनले कर्णालीको टिमको व्यापक चर्चा भएको छ । सामाजिक सञ्जालमा पनि चर्चित कर्णालीको टिम पेपरमा पनि सन्तुलित देखिएको छ ।

अर्कोतर्फ कुनै समय पुबुदुको प्रशिक्षणमा राष्ट्रिय टोलीमा खेलेका ज्ञानेन्द्र मल्ल अब प्रशिक्षकका रूपमा आमनेसामने हुँदै छन् भने पुबुदुकै प्रशिक्षणमा खेलेका सोमपाल मार्की तथा कप्तान छन् । यो हिसाबले यसलाई गुरु भर्सेस् चेलाको रूपमा पनि हेर्न सकिन्छ ।

त्यसकारण पहिलो खेल जितेर आएको जनकपुर र कर्णालीको बीचमा हाई भोल्टेज खेल हुने अनुमान गर्न सकिन्छ ।

खेल : कर्णाली याक्स भर्सेस् जनकपुर बोल्ट्स
मिति र समय : मंसिर १७, दिउँसो सवा १ बजे
सम्भावित प्लेइङ ११ :
कर्णाली याक्स : चाडविक वाल्टन, शिखर धवन, देव खनाल, रित गौतम बाबर हायात, जीशान मकसुद, गुल्शन झा, मौसम ढकाल, सोमपाल कामी, भुवन कार्की, नन्दन यादव

जनकपुर बोल्ट्स : आसिफ शेख, अनिल शाह, लाहिरु मिलान्था, हर्श थाकर, शुभ कंसाकार, जिमी निशम, मोहमद मोहसिन, अरनिको यादव, तुलबहादुर थापा, किशोर महतो, ललित राजवंशी