अध्ययन बिदा दुरुपयोगबारे संसदीय समितिले त्रिवि पदाधिकारीसँग छलफल गर्ने

२३ मंसिर, काठमाडौं । संसदको शिक्षा, स्वास्थ्य तथा सूचना प्रविधि समितिले अध्ययन बिदामा भइरहेको दुरुपयोगबारे त्रिभवन विश्वविद्यलायका पदाधिकारीलाई बोलाएर छलफल गर्ने भएको छ ।

समिति सभापति अम्बरबहादुर थापाले अध्ययन बिदामा गएका त्रिविका प्राध्यापक नफर्किएको गुनासो आएपछि त्रिविका पदाधिकारीलाई बोलाएर छलफल गर्ने बताएका हुन् ।

‘राज्यको सेवा सुविधा खाएर नफर्किने प्राध्यापकबारे अध्ययन अनुसन्धान गर्छौं । कति प्राध्यापकले बिदा लिएर फर्किएका छैनन् त्यसको विवरण माग्छौं,’ सभापति थापाले भने ।

त्रिविबाट विवरण उपलब्ध भएपछि अनुसन्धान गरेर आवश्यक कारबाहीका लागि निर्देशन दिने सभापति थापाले बताए । ‘यो शिक्षकबाट भएको लापरबाही हो । अनुसन्धान गरेर कारबाहीका लागि समितिले निर्देशन दिन्छ,’ उनले भने ।

त्रिविका प्राध्यापकले ५ वर्ष अध्ययनको बिदा पाउँछन् । बिदामा बस्दा तलब पनि दिइने गरेको छ । अध्ययन बिदा सकिएपछि फर्किएर सेवा गर्ने कबुल शिक्षकले गरेको हुन्छ । फर्किएर ३ वर्षसम्म अध्ययन बिदा पूरा गरेकाले कम्तीमा ३ वर्ष र सोभन्दा बढी बिदा उपभोग गरेकाले कम्तीमा ५ वर्ष सेवा गर्नुपर्ने व्यवस्था छ ।

यो पनि पढ्नुहोस

पूर्वभीसीहरूको प्रस्ताव– अध्ययन बिदा दुरुपयोग छानबिन समिति बनाऔं

तर, बिदा सकिएपछि धेरै शिक्षक विदेशमै लुक्ने गरेको पाइएको छ । १० वर्षमा ८९३ जना शिक्षकले अध्ययन बिदा लिएको देखिन्छ । तर यसमध्ये कति फर्किए, कतिले अध्ययन पूरा गरे, कतिले नगरी फर्किए र कति फरार छन् भन्ने अभिलेख त्रिविसँग छैन । १० वर्षमा बिदा बस्ने शिक्षकको तलब मात्रै हिसाब गर्दा पनि न्यूनतम १ अर्ब ७६ करोड भन्दा धेरै हुन आउँछ ।

यो विषयमा त्रिविले पनि अनुसन्धान थालेको छ । त्रिविले डिन कार्यालय, केन्द्रीय विभाग, सम्बन्धित क्याम्पसलाई १० दिनको समय दिएर अध्ययन बिदामा गएर नफर्किने शिक्षकको विवरण उपलब्ध गराउन पत्रचार गरेको छ । सबै ठाउँबाट विवरण आएपछि नफर्किने प्राध्यापकबाट खाएको तलब असुल गर्ने त्रिविको पदाधिकारीले बताएका छन् ।

यो पनि पढ्नुहोस

अध्ययन बिदामा विदेश गएका त्रिविका प्राध्यापक उतै लुक्छन्

यो पनि पढ्नुहोस

‘अध्ययन सकेपछि उतै लुक्नेलाई खोजेर पनि कारबाही गर्छु’

यो पनि पढ्नुहोस

‘पढ्न गएर उतै लुक्दा प्राध्यापकको नैतिकतामा ह्रास आयो’