एनपीएलमा आज जनकपुर र सुदूरको ‘हाई भोल्टेज’ खेल, शेख दाजुभाईको भिडन्त

२५ मंसिर, काठमाडौं । नेपाल प्रिमियर लिग (एनपीएल) मा आज शीर्ष स्थानको जनकपुर बोल्ट्स र दोस्रो स्थानको सुदूरपश्चिम रोएल्सबीच खेल हुनेछ । यो खेल कीर्तिपुरस्थित टीयू अन्तर्राष्ट्रिय क्रिकेट मैदानमा बिहान ९ बजे सुरु हुनेछ ।

अहिलेसम्म खेलेका चारवटै खेल जितेर एक्लो अपराजित टोली जनकपुर त्यो लय कायम राख्दै प्लेअफ यात्रा पक्का गर्न चाहन्छ । यस्तै लगातार तीन खेल जितेर पछिल्लो खेलमा चितवन राइनोजसँग स्तब्ध बनेको सुदूरपश्चिम पनि फेरि जित हात पार्दै प्लेअफको सम्भावना बलियो बनाउने लक्ष्यमा छ ।

दुई शीर्ष टिमबीचको यस खेल हेर्न धेरै समर्थकले प्रतिक्षा गरिरहेका छन् । एकातिर अनिल शाहको कप्तानीमा रहेको अपराजित टिम । अर्कोतिर दीपेन्द्र सिंह ऐरीको कप्तानीमा रहेको सुदूर टिम । सुदूर टिम समर्थकका हिसाबले पनि धेरै फ्यान बेस भएको टिम हो । सिंगो सुदूरपश्चिम प्रदेश नै यस टिमको समर्थनमा छ । टीयू मैदानमा पनि खेल हेर्न सुदूरकै समर्थक धेर भेटिन्छन् ।

जनकपुरले अहिलेसम्म विराटनगर किंग्स, कर्णाली याक्स, पोखरा एभेन्जर्स र लुम्बिनी लायन्सलाई पराजित गरिसकेको छ । सुदूरपश्चिमले सुरुवाती तीन खेलमा विराटनगर किंग्स, काठमान्डु गुर्खाज र लुम्बिनी लायन्सलाई पराजित गरेको थियो भने त्यसपछि चितवन राइनोजसँग पराजित भएको थियो ।

अनिल शाहको कप्तानीमा रहेको जनकपुरले टप अर्डर देखि बलिङमा राम्रो प्रदर्शन गरिरहेको छ । अनिल र मार्की आसिफ शेखसहित लाहिरु मिलान्थाले टप अर्डर सम्हालेनछन् । यी तीन खेलाडीमा जनकपुरको ब्याटिङ धेरै निर्भर रहन्छ । त्यसपछि न्युजिल्याण्डका अलराउण्ड र क्यानडाका अलराउण्ड हर्श थाकर मिडल अर्डरमा हुनेछन् । त्यसमा नेपालका युवा ब्याटर शुभ कंसारले पनि पछिल्लो खेलमा राम्रो खेलेका थिए । जनकपुरसँग विक्लपमा यू१९ टिमका ओपनर आकाश त्रिपाटि पनि छन् । यसैगरी अर्का विदेशी अलराउण्ड मोहम्मद मोहसिनले बलिङ राम्रो गरिरहेका छन् ।

बलिङमा नेपालका ललित राजवंशी र किशोर महतो मुख्य खेलाडीका रुपमा छन् । यू१९ टिमका कप्तान हेमन्त धामी पनि पेस बलिङमा हुनेछन् । अर्को एक स्थानमा शेर मल्ल वा तुल बहादुर थापा खेल्न सक्छन् । वा अन्य विकल्प पनि प्रयोग गर्न सकिनेछ ।

उता सुदूरपश्चिमा पछिल्ला खेलहरुमा विनोद भण्डारी र सैफ जैब ओपनिङमा सेट छन् । वान डाउनमा ब्राण्डन म्याकमुलेनले खेल्नेछन् । त्यसपछि भने आवश्यकता अनुसार दीपेन्द्र सिंह ऐरी, आरिफ शेख, इशान पाण्डेले ब्याटिङ गर्नेछन् । विकल्पमा सुदूरसँग अमित श्रेष्ठ, युवा ओपनर अर्जुन कुमाल पनि छन् ।

नरेश बुढाएर ब्याटरको भूमिका खेलेपनि खासै ब्याटिङ गर्नुपरेको छैन । तर उनी फिल्डिङमा भने राम्रो गरिरहेका छन् । जैब, म्याकमुलेन र दीपेन्द्रले आवश्यकता अनुसार ४ ओभर बलिङ पनि गर्न सक्ने हुँदा सुदूरलाई बलिङमा फाइदा छ । स्कट कुगेलेइन, नरेन साउद र अविनाश बोहरा मुख्य बलरका रुपमा छन् । यस बाहेक चौथो विदेशी खेलाडीको कोटामा सुदूरले दिलप्रित बाजवा वा हर्मित सिंह मध्ये एकलाई खेलाउन सक्छ ।

यसअघि युएईका रोहन मुस्ताफा एक खेल मात्र खेलेर फर्किएपछि उनको स्थानमा आएका क्यानडाका दिलप्रितले पछिल्लो खेलमा चितवनविरुद्ध खेलेका थिए । अमरेिकन हर्मित पनि काठमाडौँ आइसकेकोले पनि जनकपुर विरुद्ध खेल्न पनि सक्छन् ।

शेख दाजुभाई भिडन्त!

यस खेल शीर्षमा रहने होडमात्र नभई दुई शेख दाजुभाई आरिफ र आसिफको भिडन्तको रुपमा समेत रहेको छ । विकेटकिपर ब्याटर आसिफ शेख जनकपुरका मार्की खेलाडी समेत हुन् । तर जनकपुरको मार्कीलाई कप्तान नबनाई अनिलाई कप्तान बनायो । आरिफलाई सुदूरले अक्सनबाट अनुबन्ध गरेको थियो । घरमा दाजुभाई भएपनि मैदानमा फरक टिमबाट खेल्दा उनीहरु राइभलरी हुने गर्छन् । राष्ट्रिय टिममा पनि दुवैले एक साथ खेलेका छन् भने यसअघि प्रेन्चाइज क्रिकेटमै पनि उनीहरुले सँगै खेलेका छन् । तर एनपीएलमा भने आरिफ र आसिफ एक आपसमा प्रतिस्पर्धा गर्न मैदान उत्रँदैछन् ।

भारतमा पनि क्रुनल पाण्ड्या र हार्दिक पाण्डया दाजुभाई फरक टिमबाट इन्डियन प्रिमियर लिग (आईपीएल) मा खेलेका थिए । जहाँ दुवैले एक अर्कालाई बलिङ गरेका थिए ।

तर शेख दाजुभाई ब्याटर भएकोले मैदानमा एकआपसमै प्रतिस्पर्धा भने नहोला । आरिफ पार्ट टाइम मिडियम पेस बलिङ गर्ने भएपनि यस एनपीएलमा उनले बलिङ गर्नुपरेको छैन । तर मैदानमा भने दुई फरक टिमबाट खेल्दा आफ्नै टिमलाई जिताउन लागि पर्छन् ।

जनकपुर लगातार जितको लयलाई निरन्तरता दिने लक्ष्यमा हुँदा सुदूरपश्चिम त्यो लयलाई ब्रेक गर्न चाहन्छ ।

खेल : जनकपुर बोल्ट्स भर्सेस सुदूरपश्चिम रोएल्स

मिति र समय : २६ मंसिर, बिहान ९ बजे

स्थान : टीयू अन्तर्राष्ट्रिय क्रिकेट मैदान, कीर्तिपुर

जनकपुर बोल्ट्स सम्भावित ११ : अनिल शाह, आसिफ शेख, लाहिरु मिलान्था, हर्श थाकर, शुभ कंसाकार/आकाश त्रिपाटी, जिम्मी नीशम, मोहम्मद मोहसिन, शेर मल्ल, हेमन्त धामी, ललित राजवंशी, किशोर महतो

सुदूरपश्चिम रोएल्स सम्भावित ११ : विनोद भण्डारी, सैफ अली जैब, ब्राण्डन म्याकमुलेन, दीपेन्द्र सिंह ऐरी, आरिफ शेख, इशान पाण्डे, नरेश बुढाएर, स्कट कुगेलेइन, नरेन साउद, हर्मित सिंह, अविनाश बोहरा