टीआरसी सम्बन्धी आयोगमा पदाधिकारी सिफारिस गर्न ३ मानवअधिकारवादी संगठनको आग्रह

३ पुस, काठमाडौं । तीन मानवअधिकारवादी अन्तराष्ट्रिय संगठनहरुले संक्रमणकालिन न्यायसम्बन्धी दुई आयोग गठनका लागि तत्काल प्रभावकारी सिफारिस समिति बनाउन प्रधानमन्त्री केपी शर्मा ओलीलाई आग्रह गरेका छन्।

एम्नेष्टी इन्टरनेशनल, ह्यूमन राइट वाच र इन्टरनेशनल कमिसन अफ जुरिष्टले एक विज्ञप्ति जारी गर्न तत्काल प्रभावकारी रुपमा सिफारिस समिति गठन गर्न र विश्वसनीय पदाधिकारीहरुको सिफारिस हुने वातावरण बनाउन आग्रह गरेका हुन् ।

१ पुस, २०८१ मा पूर्वप्रधानन्यायाधीश ओमप्रकाश मिश्र नेतृत्वको सिफारिस समितिको पदावधि समाप्त भएको छ । समितिले सार्वजनिक गरेको नामावलीमा पनि द्वन्द्वपीडितहरुले असन्तुष्टि जनाएका छन् ।

सत्तारुढ दलमध्येको एक नेपाली कांग्रेसका सभापति शेरबहादुर देउवा र प्रमुख विपक्षी दलका नेता एवं पूर्वप्रधानमन्त्री पुष्पकमल दाहाललाई त्यही व्यहोराको पत्र पठाउदै उनीहरुले यसअघि सिफारिस समितिले सार्वजनिक गरेका नाममा व्यापक असन्तुष्टि भएकाले फेरि प्रक्रिया थाल्न आग्रह गरेका छन् ।

‘कानुनमा परिकल्पना गरेबमोजिम आयोगहरूले आफ्ना महत्त्वपूर्ण कार्यादेशहरू पूरा गर्न आयुक्तहरूमा दक्षता, निष्ठा र जन विश्वास अत्यावश्यक हुन्छ’ उनीहरुले पत्रमार्फत भनेका छन्, ‘पीडित, उत्तरजीवी, नेपाली नागरिक समाज र अन्तर्राष्ट्रिय संघसंस्थाले उठाएका चासोलाई सम्बोधन गर्दै अहिलेको पद्धतिलाई पुनर्विचार गर्दै थप ढिलाइ नगरी नयाँ समिति गठन गर्न हामी सरकारलाई आग्रह गर्दछौं ।’