लोडसेडिङ हुँदा खुसी हुनेले नै लोडसेडिङको हल्ला फैलाए : कुलमान घिसिङ

५ पुस, काठमाडौं। नेपाल विद्युत् प्राधिकरणका कार्यकारी निर्देशक कुलमान घिसिङले मुलुकमा लोडसेडिङ हुँदा रमाउने जमात देखिएको बताएका छन् ।

नेपाल पूर्वाधार पत्रकार समाजद्वारा शुक्रबार आयोजित कार्यक्रममा घिसिङले लोडसेडिङ हुँदा रमाउने जमातले नै लोडसेडिङको हल्ला फैलाएको पनि बताएए ।

अहिले लोडसेडिङ नभएर आयोजनामा आएको प्राविधिक कारण केही घण्टा जलविद्युत् वितरणमा समस्या भएको उनको भनाइ छ । उनले माथिल्लो तामाकोशी र कालिगण्डकी बन्ने बित्तिकै लोडसेडिङ समस्या समाधान हुने दाबी गरे ।

उनले व्यस्त समयमा केही मात्रै उद्ययोगको लाइन काटेको जिकिर गर्दै त्यो समयमा नागरिकलाई सहज बनाएको बताए । उद्योगीले सोही व्यस्त समयमै विद्युत् काट्यो भनेर बखेडा झिकेको उनको भनाइ छ ।

‘तामाकोशी १० दिनमा जोडिएपछि त्यो समस्या पनि हराउँछ,’ उनले भने । नेपालको पूर्वाधार क्षेत्रमा ठुल्ठूला विकासका परियोजनमा काम भइरहेको उनको भनाइ छ ।

उनले जनतालाई लोडसेडिङमा राखेर उद्योगले प्रयोग गरेको विद्युत् रकम व्यवसायीले दिनुको विकल्प नभएको बताए ।

दुई÷चार घण्टा बिजुली कम आयो भन्दैमा सिमेन्टको मूल्य बढाउन नपाइने उनको भनाइ छ । उनले चौबिसै घण्टा लाइन दिँदा पनि ८ घण्टाभन्दा बढी उद्योग चल्ने अवस्था नभएको दाबी गरे ।