चितवनको हात्ती प्रतियोगिता रोक्न भन्दै जोन अब्राहमले लेखे नेपालका मन्त्रीलाई पत्र

काठमाडौं । चितवनमा आयोजना गरिने हात्ती महोत्सवको नाममा जनावरमाथि दुर्व्यवहार हुने गरेको भन्दै चर्चित भारतीय फिल्म अभिनेता जोन अब्राहमले संस्कृति, पर्यटन तथा नागरिक उड्डयनमन्त्री बद्री पाण्डेलाई पत्र लेखेका छन् ।

उक्त महोत्सवको क्रममा हात्तीलाई कुटपिट गर्ने गरिएको, दौडन, सवारीमा प्रयोग गर्न र पोलो र फुटबल खेल्न बाध्य पारिएको अभिनेता अब्राहमले पत्रमा उल्लेख गरेको टाइम्स अफ इण्डियाले जनाएको छ ।

‘यी बुद्धिमान र संवेदनशिल जनावरले खेलको क्रममा शारिरिक र भावनात्मक कष्ट सहन्छन्’ मन्त्री पाण्डेलाई अब्राहमले लेखेको पत्रमा उल्लेख रहेको जनाइएको छ ।

‘जसले प्राकृतिक बासस्थानमा हात्तीहरूको सुन्दरता देखेको छ । म भन्न सक्छु कि तिनीहरु शक्ति र बुद्धिको प्रतीक समेत हुन् । उनीहरु धेरै अर्थबाट राष्ट्रिय खजाना हुन् । नेपालसँग यी सुन्दर जनावरलाई संरक्षण र सम्मान गरेर नेतृत्वदायीरुपमा अघि बढ्ने मौका छ’ पत्रमा उल्लेख छ ।

पत्रमा अभिनेता अब्राहमले मन्त्री पाण्डेलाई हात्ती प्रतियोगिता स्थगित गर्न आग्रह गरेका छन् । ‘यति मात्र होइन, सबै जीवित प्राणीप्रति दया र सम्मानको मूल्य कायम गर्न र साझा भविष्य बनाउनेतर्फ नेपाल अघि बढ्नेछ भन्ने विश्वास लिएको छु’ अब्राहमले भनेका छन् ।

‘नेपालको लागि मेरो हृदयमा विशेष स्थान छ । म विश्वस्त छु कि यस्तो उज्वल भविष्य नागरिकको सम्मान, जंगली जनावरप्रतिको माया र अनुपम प्राकृतिक सौन्दर्यको संरक्षणबाट हुनेछ’ उनले भनेका छन् ।

उक्त महोत्सवमा हात्तीलाई कुटेर रगताम्मे पर्ने गरिएको र पर्यटकको सवारीको लागि पनि प्रयोग गर्ने गरिएको उल्लेख छ । जोन अब्राहम चर्चित बलिउड अभिनेता हुन् । उनका फिल्मले नेपालका हलमा राम्रो कमाइ गरेका छन् ।