चोभार सुख्खा बन्दरगाहको चार किल्ला निर्धारण

१० फागुन, काठमाडौं । पूर्वाधार निर्माण सकिएको ७ महिनापछि चोभार सुख्खा बन्दरगाह क्षेत्रको चार किल्ला निर्धारण भएको छ । अर्थ मन्त्रालयको प्रस्तावमा निर्धारण भएको चार किला क्षेत्रलाई भन्सार क्षेत्र घोषणा गरिएको हो । राजपत्रमा सूचना प्रकाशित गर्दै सरकारले हालको कीर्तिपुर नगरपालिका–६ को सुख्खा बन्दरगाह क्षेत्रलाई भन्सार क्षेत्र घोषणा गरेको हो ।

भन्सार ऐन २०६४ को दफा ३ ले दिएको अधिकार प्रयोग गरी भन्सार क्षेत्रको चार किल्ला निर्धारण गरिएको राजपत्रको सूचनामा उल्लेख छ । सूचना अनुसार साविकको चोभार भूतखेल गाविस हाल कीर्तिपुर नगरपालिका–६ को सुक्खा बन्दरगाह भन्सार कार्यालय चोभारले ओगटेको चार किल्लाभित्रको २ सय ६० रोपनी क्षेत्रलाई भन्सार क्षेत्र तोकिएको हो ।

यो पनि पढ्नुहोस

तयार भयो चोभार सुख्खा बन्दरगाह (फोटोफिचर)

भन्सार अन्तर्गत पूर्व दिशामा बागमती नदी मसानघाटदेखि दक्षिणमा शिल खोल्सी बागमती नदीमा मिसिएको बिन्दुभित्रको क्षेत्र पर्छ भने पश्चिममा माथिल्लो गुठ बस्तीसँग जोडिएको बल्खु दक्षिणकाली सडकमा मसानघाट जानेबाटो जोडिएको बिन्दु र दक्षिणतर्फ तल्लो गुठ बस्तीसँग जोडिएको गोरेटो बाटो भन्सार क्षेत्र हुने भनिएको छ ।

यस्तै उत्तरमा बल्खु दक्षिणकाली सडकबाट पूर्वतर्फ मसान घाटा जाने बाटो बागमती नदी जोडिएको बिन्दुसम्म र सो बाटोसँग जोडिएको खोल्सीलाई भन्सार क्षेत्र घोषणा गरिएको छ ।

२०७५ असारमा निर्माण सुरु भएको बन्दरगाहको भौतिक पूर्वाधार निर्माण गत असारमा सम्पन्न भएको थियो ।

हेर्नुहोस् सूचना :