प्रधानमन्त्रीका स्वकीय सचिवका ज्वाइँ पहिलो वरियतामा एसएसपी बढुवा सिफारिस

८ साउन, काठमाडौं । प्रधानमन्त्री शेरबहादुर देउवाका स्वकीय सचिव भानु देउवाका ज्वाइँ दिपेन्द्र कुँवर प्रहरी वरिष्ठ उपरीक्षक (एसएसपी) मा बढुवाका लागि सिफारिस भएका छन् । दुई नम्बर ज्येष्ठतामा क्रममा राखेर आइतबार गृह मन्त्रालयले उनलाई बढुवा गरेको हो ।

हाल १ नम्बरमा बढुवा भएका प्रविण कँडेल नेपाल प्रहरीबाट स्थान्तरण भएर आएका अधिकृत हुन् । त्यसैले कुँवर आफ्नो ब्याचमा एक नम्बरमा उक्लिएका छन् । कुँवर कायममुकायम एसएसपी र प्रहरी उपरीक्षक (एसपी) हुँदा ११ नम्बरमा थिए । सशस्त्र प्रहरी निरीक्षकका रुपमा भर्ना हुँदा पनि उनी ७५ जनामा अन्तिम पाँचमा थिए ।

स्रोतका अनुसार उनलाई १ नम्बरमा बढुवा सिफारिस गर्न गृहमन्त्री बालकृष्ण खाण पनि सकरात्मक थिएनन् । तर बालुवाटारको दबावमा उनी शीर्ष स्थानमा बढुवा सिफारिसमा परेका हुन् ।

कुँवरलाई कामु एसएसपीबाट एसएसपी बनाउन गृह मन्त्रालयले सशस्त्र प्रहरी बलको नियमावलीलाई नै संशोधन गरेको थियो । सशस्त्र प्रहरी नियमावली, २०७२ मा ‘सशस्त्र प्रहरी सेवामा बढुवाका लागि सम्भाव्य उम्मेदवार हुन बढुवा हुने श्रेणी वा तहभन्दा एक तह मुनिको पदमा चार वर्ष सेवा अवधि पूरा भएको हुनुपर्ने’ प्रावधान थियो ।

तर कुँवरको चार वर्षे अवधि पूरा नभएकाले यसलाई घटाएर तीन वर्ष कायम गरिएको थियो । कुँवरलाई कामु एसएसपी बन्न बाधा हुने भएपछि यसअघि लामो समयसम्म बढुवा नै रोकिएको थियो ।

हाल सशस्त्र प्रहरी बलमा प्रहरी नायब महानिरीक्षक (डीआईजी) को तीन दरबन्दी रिक्त छ । त्यसमा कुँवरलाई बढुवा गर्ने गरी हाल एसएसपीमा पहिलो नम्बरमा राखिएको सशस्त्र प्रहरीका एक उच्च अधिकृत बताउँछन् ।

उनी भन्छन्, ‘निरीक्षक, डीएसपीमा निकै पछाडि रहेका अधिकृत एकैपटक कसैको आर्शिवादमा अगाडि ल्याउँदा सशस्त्र प्रहरीका तमाम अधिकृतहरुको मनोबल नै गिरेको छ ।’ यसले संगठनमा व्यवसायिक अधिकृतहरुलाई असर पुर्‍याएको उनले गुनासो गरे ।

सशस्त्र प्रहरी नियमावली अनुसार एसएसपीबाट प्रहरी नायब महानिरीक्षक (डीआईजी) मा बढुवा हुन स्टाफ कलेज पास गरेको हुनुपर्ने प्रावधान छ । तर त्रिभुवन विश्वविद्यालयले लिने स्टाफ कलेजको प्रवेश परीक्षामै कुँवर दुई पटक अनुत्तीर्ण भएका थिए ।

‘उहाँ दुई पटक अनुत्तीर्ण हुनु भएको थियो, त्यसपछि उहाँलाई विना प्रतिष्पर्धा नेपाली सेनाको स्टाफ कलेज कोर्सका लागि सहभागी गराइएको थियो’ सशस्त्र प्रहरी स्रोत भन्छ, ‘तीन पटकसम्म पनि असफल भए फेरि परीक्षा दिन पाइन्नथ्यो, त्यसैले उनलाई सिधैँ सेनाको कलेजमा लागि छनौट गरिएको थियो ।’

स्रोतका अनुसार सेनाको स्टाफ कलेजमा लागि वर्षमा दुईजना सशस्त्र प्रहरी अधिकृतलाई पठान्छ । अन्य समयमा प्रतिष्पर्धाका आधारमा पठाउने गरेको भए पनि कुँवरलाई विना प्रतिस्पर्धा पठाइएको सशस्त्र प्रहरी स्रोतको दाबी छ ।

आइतबार भएको बढुवा सिफारिसको तेस्रो नम्बरमा विष्णुप्रसाद भट्ट, त्यसपछि दिगविजय सुवेदी, विश्वकुमार भट्टराई, भुपेन्द्र केसी र कमलप्रसाद तिउसीना छन् । बढुवा सिफारिसमा परेका सुवेदी बाराको सशस्त्र प्रहरी प्रमुख हुँदा कार्यसम्पादनमा प्रश्न उठेपछि जिम्मेवारीबाट हटाइएका अधिकृत हुन् ।

तिउसीनापछि नीरकृष्ण अधिकारी, सुधिरजंग थापा, किरण बस्नेत, माधवप्रसाद पौडेल, उद्धबबहादुर न्यौपाने, राजेन्द्र खड्का, नरेन्द्र सेन, किरण ढुंगाना र शंकर खनाल बढुवा सिफारिसमा परेका छन् ।