कांग्रेसको घोषणा पत्र तयारी समितिको प्रवक्तामा सहमहामन्त्री परियार

६ असोज, काठमाडौं । नेपाली कांग्रेसको प्रतिनिधिसभा र प्रतदेशसभा निर्वाचनको घोषणापत्र तयारी समितिको प्रवक्ताको जिम्‍मेवारी सहमहामन्त्री जीवन परियारलाई दिइएको छ ।

बिहीबार बसेको घोषणा पत्र तयारी समितिको बैठकले सहमहामन्त्री परियारलाई प्रवक्ताको जिम्‍मेवारी दिएको हो ।

‘सञ्चार माध्यमका साथीहरूले आवश्यक सूचना एवं विविध बिषयमा क्रमशः तय हुने अवधारणाका लागि उहाँलाई सम्पर्क गर्न सक्नुहुनेछ । समितिका तर्फबाट आवश्यकता अनुरुप प्रवक्ता परियारले सम्पर्क स्थापित गर्नुहुने जानकारी पनि गराइन्छ ।’ समितिका सदस्य सचिव डा. प्रदीप पराजुलीद्वारा जारी विज्ञप्तिमा छ ।

बुधबार मात्रै नेपाली कांग्रेसका सभापति शेरबहादुर देउवाले प्रतिनिधिसभा तथा प्रदेशसभा निर्वाचन घोषणापत्र तयारी समितिमा ४१ सदस्य मनोनित गरेका थिए।