२०७९ कात्तिक १६ गते १६:०९ 
१६ कात्तिक, काठमाडौं । प्रधानमन्त्री कप राष्ट्रिय एकदिवशीय क्रिकेट प्रतियोगितामा गण्डकी प्रदेशले कर्णालीलाई ३२ रनले पराजित गरेको छ । प्रतियोगितामा गण्डकीको यो लगातार दोस्रो जित हो ।
समूह ए अन्तर्गत त्रिवि मैदानमा २०९ रनको विजयी लक्ष्य पछ्याएको कर्णाली ४७ ओभरमा १७६ रनमै समेटियो ।
कर्णालीका लागि हिमान्सु शाहीले सर्वाधिक ६९ रन बनाए । उनले ११६ बलमा ८ चौका प्रहार गरे । ओपनर तथा कप्तान रविन्द्र शाहीले ४२ रन र प्रकाश जैसीले १५ बनाउनुबाहेक कर्णालीका अन्य सबै ब्याटरले दोहोरो कंकको रन जोड्न सकेनन् ।
बलिङतर्फ गण्डकीका लागि सुभास भण्डारी र चन्द्र पौडेलले सर्वाधिक ३-३ विकेट लिए । कप्तान विपिन खत्रीले २ विकेट लिए ।
यसअघि टस हारेर ब्याटिङको निम्तो पाएको गण्डकीले निर्धारित ५० ओभरमा ९ विकेट गुमाउँदै २०८ को योगफल खडा गरेको थियो ।
गण्डकीका लागि चौथो क्रमका ब्याटर अभिषेक बस्नेतले सर्वाधिक ५१ रन बनाए । उनले ४५ बलमा ८ चौका र १ छक्का प्रहार गरे । ओपनर ब्याटर अर्जुन कुमाल ४९ रनमाक्याच आउट भए । विधान श्रेष्ठ ६ रनमा आउट भए । अर्जुन र विधानले दोस्रो विकेटका लागि ६७ रनको साझेदारी गरी पारी उकासेका थिए ।
बलिङतर्फ कर्णालीका लागि अनुज चनराले सर्वाधिक ४ विकेट लिए । उनले ९ ओभरमा ५१ रन खर्चिए । त्यस्तै प्रकाश जौशीले ३ र दिनेश अधिकारीले २ विकेट लिए ।
तस्वीरहरूः विकास श्रेष्ठ/अनलाइनखबर
प्रतिक्रिया 4