प्रधानमन्त्री प्रचण्डले यही महिनाभित्र विश्वासको मत लिने

१४ पुस, काठमाडौं । प्रधानमन्त्री पुष्पकमल दाहाल ‘प्रचण्ड’ले यही महिनाभित्र विश्वासको मत लिने भएका छन् ।

प्रतिनिधि सभाको अधिवेशन २५ पुसबाट सुरु हुँदैछ । संसद अधिवेशनको पहिलो दिन पार्टीका शीर्ष नेताहरुले सम्बोधन गर्ने र शुभकामना आदानप्रदान गर्ने अभ्यास छ । त्यस लगत्तै विश्वासको मत लिने तयारी रहेको प्रधानमन्त्री निकटका नेताहरु बताउँछन् ।

प्रधानमन्त्रीले विश्वासको मत लिने मितिका विषयमा बिहीबार बसेको सत्ता साझेदार दलहरुको बैठकमा छलफल भएको थियो । छलफलमा स्वयम प्रचण्डले आफूले यही महिनाभित्र (पुस २९ गते) प्रधानमन्त्रीले विश्वासको मत लिने चाहना रहेको बताएका थिए । प्रचण्डको चाहनामा सत्ता साझेदार दलहरु सकारात्मक रहेको नेताहरु बताउँछन् ।

प्रचण्ड यही पुस ११ गते ४४ औं प्रधानमन्त्रीमा नियुक्त भएका हुन् । उनलाई नेकपा एमाले, माओवादी केन्द्र, राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टी (राप्रपा), जनता समाजवादी पार्टी (जसपा) जनमत पार्टी, नागरिक उन्मुक्ति पार्टी (नाउपा)को समर्थन छ ।

एमाले, माओवादी, रास्वपा र जनमत पार्टी सरकारमा सहभागी भइसकेको छ । बाँकी, राप्रपा, नाउपालाई सरकारमा सहभागी गराउने प्रयास एमाले र माओवादीले गरिरहेका छन् । साथसाथै, नेकपा एकीकृत समाजवादीलाई समेत सरकारमा सहभागी गराउने प्रयास उनीहरुको छ ।

सरकारमा ८ दललाई सहभागी गराउने आधार तयार गरेर विश्वासको मत लिने र लगत्तै मन्त्रिपरिषदलाई पूर्णता दिने प्रचण्डको तयारी छ ।