४ प्रकारका ह्‍यांगिङ प्लान्ट, जुन घरभित्र आकर्षक तरिकाले सजाउन सकिन्छ

घरमा सजाइएका बिरुवाले हामीलाई प्रकृतिको नजिक रहेको महसुस गराउँछन् । तर घरमा ठाउँको अभावले बोटबिरुवा रोप्ने इच्छा पूरा गर्न नसकेको हुन सक्छ । यसका लागि घरमा ह्यांगिङ प्लान्ट लगाउन सकिन्छ ।

यसलाई घरको बार्दली, छतलगायत ठाउँमा राख्न सकिन्छ । ह्यांगिङ प्लान्टले घरलाई नै फरक ‘लुक्स’ दिन्छ । ह्यांगिङ प्लान्ट विभिन्न प्रकारका हुन्छन् ।

टर्टल वाइन

यो बिरुवा एक पटक सार्‍यो भने वर्षौंसम्म रहन्छ । धेरै छिटो बढ्ने यो बिरुवाको पात हल्का हरियो रंगको हुन्छ । यसलाई झुण्डाउँदा निकै सुन्दर देखिन्छ ।

मनी प्लान्ट

तपाईं घरमा बिरुवा रोप्दै हुनुहुन्छ भने यो उत्तम बिरुवा हो ।  यो हुर्काउन पनि सजिलो छ  । यो बिरुवा भित्तामा झुण्ड्याएर राख्दा घर सुन्दर देखिन्छ ।

बेबी टियर्स

साना गोलाकार पात हुने भएकाले यो बिरुवाको नाम बेबी टियर्स राखिएको हो । साना पात भएको लहरा जाने यो बिरुवालाई बार्दली, घरको प्रवेशद्वार वा झ्यालको छेउमा झुण्ड्याउन सकिन्छ ।

इङ्लिस पवि

इङ्सलिस पविको खास नाम हेडेरा हेलिक्स हो । यो इनडोर प्लान्ट कम प्रकाशमा राम्रोसँग फस्टाउँछ । यसलाई गमलामा झुण्ड्याएर आकर्षक तरिकाले सजाउन सकिन्छ ।

कसरी रोप्ने ?

ह्यागिङ प्लान्टलाई कटिङबाट रोप्न सकिन्छ । नर्सरीमा गएर यसको बिरुवा ल्याएर रोप्दा पनि हुन्छ र घरमै कटिङ गरेर पनि रोप्न सकिन्छ ।

माटो र मलको मिश्रण तयार गरेर यस्ता बिरुवालाई सार्न सकिन्छ । बलौटे माटो र कम्पोस्ट मलको प्रयोग गरियो भने त झन् राम्ररी सप्रिन्छ । यसमा समय-समयमा गोबर, बोनमिल, निमको धुलो राख्नुपर्छ । यसले गर्दा बिरुवा हुर्किन सजिलो हुन्छ ।

यसलाई गर्मी महिनामा दिनमा एक पटक सिंचाई गर्नुपर्छ भने जाडोमा दुई दिनमा एक पटक गरे पुग्छ ।

कसरी स्याहारसुसार गर्ने ?

– महिनामा एक पटक कम्पोस्ट हाल्नुपर्छ । सानो बिरुवा छ भने एक चम्चा ठूलो बिरुवा छ भने एक मुठ्ठी मल हाल्नुपर्छ ।

– सुकेको हाँगालाई बेलाबेला काँटछाँट गर्ने । महिनामा एकपटक गोडमेल गर्ने ।

– बिरुवामा कीरा र रोग लाग्न नदिन कीटनाशक औषधि र निमको धुलो हाल्ने ।

– गर्मीमा दैनिक सिंचाई गर्ने, जाडोमा भने एक वा दुई दिन बिराएर सिंचाई गर्ने ।

(तामाङ रक्षा नर्सरीका सञ्चालक हुन् ।)