बाह्रबिसे सबस्टेसन निर्माणमा ढिलासुस्ती, असारभित्र सम्पन्न गर्न कुलमानको निर्देशन

२५ फागुन, काठमाडौं । सिन्धुपाल्चोकको बाह्रबिसेमा निर्माणाधीन २२० केभी सबस्टेसन निर्माणको काम सन्तोषजनक नभएको पाइएको छ ।

नेपाल विद्युत प्राधिकरणले अनुगमनका क्रममा ठेक्का पाएका चिनियाँ कम्पनीहरु ग्वाङसी ट्रान्समिसन एण्ड सबस्टेसन कन्ट्रक्सन तथा सेन्जेन क्लाउ इलेक्ट्रोनिक्सको काम सन्तोषजक नभएको पाइएको हो ।

प्राधिकरणका कार्यकारी निर्देशक कुलमान घिसिङले बुधबार सबस्टेसन निर्माणस्थलको निरीक्षण गरी आगामी असारभित्र निर्माण सम्पन्न गर्न निर्देशन दिएका छन् ।

चिलिमे जलविद्युत कम्पनीको अगुवाइमा सिन्धुपाल्चोकमा निर्माणाधीन १०२ मेगावाटको मध्यभोटेकोसी जलविद्युत आयोजनाको विद्युत बाह्रबिसे सबस्टेसनमा जोडिने छ ।

आयोजना असारभित्रमा निर्माण सम्पन्न गर्ने लक्ष्यका साथ निर्माण भइरहेको छ । यो सबस्टेसनको निर्माण नभएमा मध्यभोटेकोसीको विद्युत राष्ट्रिय प्रसारण प्रणालीमा जोड्न नसकी खेर जाने छ ।

कार्यकारी निर्देशक घिसिङले त्यस्तो अवस्था आएमा १०२ मेगावाटको विद्युत आयोजनाले विद्युत बिक्री गरी दैनिक रुपमा प्राप्त हुने आम्दानी हिसाब गरी ठेकेदार कम्पनीले बेहोर्नु पर्ने चेतावनी समेत दिएका छन् ।