कसरी बन्द गरिन्छ कानको लोतीमा परेको प्वाल ?

गहना लगाउने क्रममा कान छेडिन्छ । समय बित्दै जाँदा लोतीको प्वाल बढ्दै जान्छ, कतिपय अवस्थामा त च्यातिन पनि सक्छ । यसरी भएको प्वाललाई कसरी बन्द गर्ने होला भन्ने कुराले धेरैलाई चिन्ता थपेको हुन सक्छ ।

यसका लागि सर्जरी लगायतका उपचार विधि छन् । तर धेरैलाई यो झन्झटिलो लाग्छ । पछिल्लो समय सर्जरीको पनि विकल्प आएको छ, इयर लोबो विधि । यसबाट सजिलै कानको लोतीमा भएको प्वाल बन्द गर्न सकिन्छ । पानी जस्तो इयर लोबो ग्लुले ब्युटी पार्लरमा गएर कानको लोती टाल्न सकिन्छ ।

कसरी बन्द गरिन्छ कानको लोती ?

सर्जरीमार्फत लोतीको प्वाल टाल्दा टाँका लगाइन्छ । धेरैले सर्जरी गराउन नमान्ने भएकाले लोतीको प्वाल तन्किएर ठूलो हुँदा पनि चासो दिंदैनथे । त्यसको विकल्पमा सामान्य टेपले टाल्नेसम्म गर्थे ।

तर अहिले यसको विकल्पमा इयर लोबो आइसकेपछि भने कानको प्वाल टाल्नेहरुलाई फाइदाजनक भएको छ ।

प्वाल कसरी बन्द गरिन्छ ?

सबैभन्दा पहिले लोती च्यातिएको वा प्वाल परेको ठाउँ सफा गरिन्छ । त्यसपछि सावधानी अपनाएर आवश्यकता अनुसार पूरै प्वाल बन्द हुनेगरी इयर लोबो लगाइन्छ । यो ग्लु लगाइसकेपछि प्वाल सबै छोपिने गरी गम्साएर टेप लगाउने गरिन्छ । यसका लागि तालिमप्राप्त ब्युटिसियनहरुले काम गर्छन् ।

टेपलाई करिब १० दिनसम्म मल्हम लगाउँदै राखिराख्नुपर्छ । त्यसपछि सावधानीपूर्वक बिस्तारै त्यो टेपलाई निकाल्नुपर्छ । त्यसको केही दिनमा लोती ठीक हुन्छ । लोती टाल्नुअघि चिकित्सकको परामर्श लिनु राम्रो हुन्छ । मधुमेहका बिरामीलाई कुनै घाउचोट लागेमा छिटो निको नहुने भएकाले उनीहरुले भने नगराउनु नै राम्रो हुन्छ ।

नेपालमा कहाँ गरिन्छ, कति लाग्छ खर्च ?

नेपालमा फेसियल हाउसमा सात वर्षअघि नै इयर लोबो प्रविधिबाट कानको लोतीको प्वाल टाल्ने गरिंदै आएको छ । अहिले बजारमा यस्तो सेवा दिने ब्युटी पार्लरहरु थुप्रै छन् ।

इयर लोबोमार्फत प्वाल टाल्दा सामान्तया १५ सय रुपैयाँ शुल्क लिने गरिएको छ । सुरुवाती दिनमा भने ३ हजार ५०० देखि आठ हजार रुपैयाँसम्म शुल्क लिने गरिएको थियो ।

कुनै साइड-इफेक्ट छ कि ?

लगाउने बेलामा सुरुमा अलि अलि पोल्ने भएपनि इयर लोबोको खासै साइड-इफेक्ट छैन । सावधानी नअपनाएमा कहिलेकाहीं घाउ पाक्ने समेत हुन सक्छ ।

टेप लगाएको ठाउँमा पानी पार्ने, टेप निकाल्दै हेर्ने, नियमित मल्हम नलगाउने गर्दा भने केही असर गर्न सक्छ । प्वाल बन्द गरेको ठाउँमा थोरै खत बस्न सक्छ । त्यसैले पूर्ण रुपमा लोतीको च्यातिएको ठाउँ निको नहुँदासम्म हल्का गहना पनि लगाउनु हुँदैन ।

(महरा काठमाडौं मलस्थित फेसियल हाउसकी सञ्चालिका हुन् ।)