धरौटीमा छुटेपछि अनलाइन बेटिङ र क्रिप्टो कारोबारमा सक्रिय

३१ जेठ, काठमाडौं । वान एक्स बेटमार्फत अनलाइन सट्टेबाजी गराउने र क्रिप्टोकरेन्सी काराबोरमा सक्रिय भएको आरोपमा प्रहरीले ५ जनालाई पक्राउ गरेको छ । काठमाडौं उपत्यका अपराध अनुसन्धान कार्यालयले काठमाडौंको विभिन्न स्थानबाट पक्राउ गरेकामा २९ वर्षका दिनेश खड्का पनि छन् ।

कैलाली लम्कीचुहा–१० घर भएका उनी चाबहिलमा बस्छन् । प्रहरीका अनुसार उनले रामविलाश डी थारु, अनिता धिताल लगायतको कागजात प्रयोग गरेर ६३ वटा खाता खोलेका थिए, जसमध्ये १२ वटाबाट ६४ करोड रुपैयाँ कारोबार भएको पाइएको छ ।

अनिताले आफ्नो मोबाइलमा बाइनान्स खाता खोलेर क्रिप्टोकरेन्सी कारोबार गर्ने गर्थिन् । दिनेशले छद्म नामबाट कनेक्ट आईपीएसमा खाता खोलेर कारोबार गर्ने गरेका थिए ।

दिनेश तिनै व्यक्ति हुन्, जो २०७८ माघमा अमेरिकी डलरको अवैध अपचलनको मुद्दामा मुछिएका थिए । नेपाली रुपैयाँलाई अमेरिकी डलरमा रुपान्तरण गरेर मोबाइल एपमार्फत अज्ञात ठाउँमा भुक्तानी गरेको आरोपमा दिनेशसहित उनका दिदी, बाबु र अनिताविरुद्ध विदेशी विनिमय अपचलनको मुद्दा नै चलेको थियो ।

उनीहरुले तीन महिनामा ३७ करोड ६४ लाखभन्दा बढी नेपाली रुपैयाँलाई डलरमा रुपान्तरण गरेर अनलाइनमार्फत अज्ञात ठाउँमा भुक्तानी गरेको राजश्व अनुसन्धान विभागको दाबी थियो । राजश्व अनुसन्धान विभागले पक्राउ गर्दा नै दिनेश क्रिप्टोकरेन्सी कारोबारमा संलग्न भएको आशंका गरिएको थियो ।

यो पनि पढ्नुहोस

२५ वर्षीय युवकको अनौठो डलर धन्दा, ३८ करोड रुपैयाँको मुद्दामा मुछियो परिवार

विभागका अधिकारीहरुका अनुसार एकातिर २९ दिनभित्र मुद्दा बुझाउनुपर्ने थियो भने तर अनिता पक्राउ नपरेका कारण क्रिप्टोकरेन्सीबारे अनुसन्धान हुन सकेको थिएन ।

मुद्दा दर्ता भएपछि जिल्ला अदालत, काठमाडौं ६ दिन थुनछेक बहस भयो, दिनेश २५ लाख रुपैयाँ धरौटी बुझाए छुटे । दिनेश नै छुटेपछि विभागले थप अनुसन्धान गरेन ।

त्यसको झण्डै डेढ वर्षपछि सट्टेबाजी गराउने र क्रिप्टोकरेन्सी कारोबारको आरोपमा दिनेश र अनिता दुबै पक्राउ परेका छन् । प्रहरीका अनुसार वानएक्स बेटमार्फत अनलाइन सट्टेबाजी गराउने दिनेश मुख्य कारोबारी हुन् ।

आईपीएल लगायतमा अनलाइन बेटिङ गराएको खुलेपछि प्रहरीले झण्डै दुई महिनादेखि उनलाई पछ्याइरहेको थियो ।

मोबाइलको माध्यमबाट लोकेसन ट्र्याक गर्न समेत कठिन भएको थियो । मैजुबहालबाट पक्राउ गर्ने क्रममा पनि उनले चलाखी गर्न खोजेका थिए । प्रहरीलाई देख्नासाथ उनले आफूसँग भएको ल्यापटप फुटाए ।

‘उनी निकै चलाख रहेछन्, प्रमाण लोप गर्न ल्यापपट नै फुटाएका थिए’, कार्यालयका एक अधिकृत भन्छन्, ‘उनका विषयमा थप अनुसन्धान भइरहेको छ ।’

प्रहरीका अनुसार पक्राउ परेकामध्ये २४ वर्षका आशिष लामिछाने चार्टर्ड एकाउन्टेन्ट नै हुन्, जसले अनलाइन बेटिङमा भएको कारोबारको हिसाब किताब राख्ने गरेका थिए । नुवाकोट ककली घर भई नागार्जुन नगरपालिका–२ मा बस्दै आएका उनले विभिन्न बैंकबाट २ करोड ९८ लाख ९५ हजार रुपैयाँको कारोबार गरेको पाइएको छ ।