+

१९औं एसियन गेम्स खेल्ने सूचीमा छैन ओलम्पियन गौरिकाको नाम

२०८० साउन  १६ गते ७:३१ २०८० साउन १६ गते ७:३१
१९औं एसियन गेम्स खेल्ने सूचीमा छैन ओलम्पियन गौरिकाको नाम

काठमाडौं । ओलम्पियन गौरिका सिंहको नाम १९औं एसियन गेम्स खेल्ने सूचीमा समावेश छैन ।

एसियन गेम्स आगामी सेप्टेम्बर २३ देखि अक्टोबर ८ सम्म चीनको हान्झाउ सिटीमा हुँदैछ । तर नेपालको पौडीबाट दुई पटक ओलम्पिक खेलिसकेकी गौरिका भने १९औं एसियन गेम्समा नदेखिने भएकी छन् ।

जेठमा भएको ११औं एनएसए कप पौडी प्रतियोगिताबाट उत्कृष्ट हुँदा गौरिकासहित डुवाना लामा तथा पुरुषतर्फ एलेक्स शाह र नासिर हुसेन चीनको होङझावमा हुने १९औं एसियन गेम्सका लागि छनोट भएका थिए ।

त्यतिबेला नेपाली पौडी संघका अध्यक्ष अशोक बज्राचार्यले प्रतियोगितामा उत्कृष्ट अंक ल्याउने २–२ जना खेलाडीलाई एसियाडका लागि छनोट गरिएको बताएका थिए ।

तर एसियन गेम्सका लागि पठाइएको पौडी खेलाडीको सूचीमा गौरिकाको नाम छैन । उनको स्थानमा अनुशिया तन्डुकारको नाम समावेश छ र बाँकी तीन खेलाडी यथावत छन् । राष्ट्रिय खेलकुद परिषद र नेपाल ओलम्पिक कमिटीको सूचीमा पौडीमा गौरिकाको नाम छैन ।

वर्ल्ड च्याम्पियनसिप खेले पनि गौरिकाले एसियन गेम्स भने नखेल्ने भएको नेपाल ओलम्पिक कमिटी स्रोतले जनाएको छ । हाल गौरिका अमेरिकामा अध्ययनरत छिन् । उनी उतैबाट वर्ल्ड च्याम्पियनसिप खेल्न जापान गएकी थिइन् ।

नेपाल ओलम्पिक कमिटीले केही दिन भित्रै १९ औं एसियन गेम्स खेल्ने सबै नेपाली खेलाडीको नाम सार्वजनिक गर्ने जनाएको छ । केही दिनअघि राष्ट्रिय खेलकुद परिषदका सदस्य सचिव टंकलाल घिसिङले एसियन गेम्समा नेपालबाट २९ खेलका २३४ खेलाडीले सहभागिता जनाउने बताएका थिए ।

गौरिकासहित चार खेलाडीले जापानको फुकुवाकोमा भएको वर्ल्ड एक्वाटिक्स च्याम्पियनसिपमा नेपालको प्रतिनिधित्व गरेका थिए । जहाँ गौरिकाले ५० मिटर र १०० मिटर ब्याक स्ट्रोकमा प्रतिस्पर्धा गर्दै नयाँ राष्ट्रिय कीर्तिमान समेत बनाएकी थिइन् ।

वर्ल्ड एक्वाटिक्स च्याम्पियनसिप २०२४ मा फ्रान्समा हुने पेरिस ओलम्पिकको लागि छनोट प्रतियोगिता समेत थियो । ओलम्पिकमा पौडी र एथलेटिक्सबाट युनिभर्सल कोटामा हरेक देशले भाग लिन पाउनेछन् ।

एसियाली खेलकुद गौरिका सिंह
लेखक
अनलाइनखबर
यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय