कपनमा खहरे खोला खोल्न महानगरले चलायो डोजर (तस्वीरसहित)

२६ साउन, काठमाडौं । काठमाडौं महानगरपालिकाले कपनको खहरे खोलामा डोजर चलाएको छ ।

काठमाडौं महानगरपालिका र बूढानीलकण्ठ नगरपालिकाका प्रतिनिधिबीच खहरे खोला खोल्न सहमति भएसँगै महानगरले खोला खोल्न डोजर चलाएको महानगरका नगर प्रहरी प्रमुख राजुनाथ पाण्डेले जानकारी दिए ।

काठमाडौं महानगर- ७ र बूढानीलकण्ठ नगरपालिका–१० को सिमानामा पर्ने खहरे खोला खोल्न अहिले दुई वटा डोजर प्रयोग भइरहेको उनले बताए ।

महानगरले बिहीबार नै सो क्षेत्रमा डोजर चलाउन खोजेको थियो । तर खोला खन्ने विषयमा बूढानीलकण्ठका जनप्रतिनिधि र स्थानीयले विरोध गरेपछि महानगरको टोली पछि हटेको थियो ।

शुक्रबार चावहिलस्थित नापी कार्यालयमा नक्सा सहित दुवै पक्षको उपस्थितिमा बसेको बैठकमा खहरे खोला खोल्ने विषयमा सहमति भएको हो ।

के भयो सहमति ?

दुवै स्थानीय तहका प्रतिनिधिबीच धोबिखोलादेखि साततल्लेसम्मको खहरे खोलामा राखिएको ह्युमपाइप निकाल्ने सहमति भएको छ ।

यस्तै नक्सा अनुसारको जग्गा छुट्याइ बाँकी भएको जग्गा खहरे खोला कायम गर्ने सहमति भएको काठमाडौं-७ का वडाध्यक्ष विमल होडाले जानकारी दिए ।

खहरे खोलामा भएको अन्य स्थानको ह्युमपाइप निकाल्ने तर धोबिखोला करिडोर, पाथीभरा बस्ती, समता टोल जाने बाटो र साततल्लेको चोकको ह्युमपाइप जस्ताको तस्तै राख्ने वा काठमाडौंले बेलीब्रिज निर्माण गर्ने सहमति भएको उनले बताए ।

हेर्नहोस् सहमतिः

तस्वीरहरू : चन्द्रबहादुर आले/अनलाइनखबर