आयातित वस्तुमा लेबलिङको समस्या : समुद्रपार निकासी पैठारी संघ 

१० असोज, काठमाडौं । नेपाल समुद्रपार निकासी पैठारी संघले आयातित वस्तुमा लेबल टाँस्नुपर्ने नियमले समस्या सृजना भएको बताएको छ ।

मंगलबार वाणिज्य विभागका महानिर्देशकलाई ज्ञापन पत्र बुझाएर संघले लेबल टाँस्नु पर्ने नियमको विरोध गरेको हो ।

संघका अध्यक्ष विनोदकुमार सेठियाले नेतृत्व गरेको प्रतिनिधिमण्डलले मंगलबार विभागका महानिर्देशक तीर्थराज चिलुवाललाई भेटी सबै आयातित वस्तु बजार पठाउनु अघि आयातकर्ता र बजार वितरकको विवरण उल्लेखित लेबल टाँस्नुपर्ने व्यवस्थाले आयातकर्तालाई निकै अप्ठ्यारो अवस्थामा पुर्‍याएको बताए ।

अध्यक्ष सेठियाले यो व्यवस्थामा सहजीकरण गरिदिन पनि आग्रह गरे । ‘नक्कली सामान भित्र्याउनेले सक्कली आयातकर्ता र वितरकको विवरण उल्लेखित टेबल टाँसेर बजारमा सामान पठाउन सक्ने जोखिम देखिन्छ,’ अध्यक्ष सेठियाले भने ।

कतिपय वस्तुको प्याकेजिङ खोलेर लेबल टाँसी पुनःप्याकेजिङ गर्न सम्भव नहुने र सम्भव भइहाले पनि व्यवसायको लागत बढ्ने संघको भनाइ छ ।

टुटेफुटेका र म्याद गुज्रेका वस्तु नष्ट गर्ने सहज कानुनी व्यवस्था नहुँदा व्यवसायीले समस्या झेलिरहेको संघको गुनासो छ ।

प्रतिनिधि मण्डलले आयातमा प्रतिबन्ध लागेका वस्तु बजारमा सजिलै बजारमा पाइरहेको विषयमा पनि महानिर्देशक चिलुवालको ध्यानाकर्षण गराएको जनाएको छ ।

यस्तै उधारो असुली ऐन निर्माणका लागि पनि विभागले पहल गर्नुपर्ने माग संघले अघि सारेको छ ।
व्यवसायीहरुसँगको छलफल पछि महानिर्देशक चिलुवालले व्यवसायीहरुको मागहरु जायज भए पनि सरकारका नीति नियमहरुले व्यवसायीलाई नै फाइदा पुग्ने गरी आएको दाबी गरे ।

महानिर्देशक चिलुवालले चोरी पैठारी रोक्नकै लागि लेबलिङको प्रावधान कार्यान्वयन गरिएको उनको भनाइ छ ।