लुम्बिनीलाई हराउँदै प्रतियोगितामा बागमतीको तेस्रो जित

१० पुस, काठमाडौं । प्रधानमन्त्री कप महिला राष्ट्रिय क्रिकेट प्रतियोगितामा लुम्बिनी प्रदेशलाई ९ रनले हराउँदै बागमती प्रदेशले तेस्रो जित निकालेको छ ।

त्रिवि क्रिकट मैदान कीर्तिपुरमा बागमतीले दिएको ११० रनको लक्ष्य पछ्याएको लुम्बिनीले निर्धारित २० ओभरमा ८ विकेट गुमाउँदै १०० रन मात्रै बनाउन सक्यो ।

लुम्बिनीका लागि कप्तान सरस्वती जीएमले सर्वाधिक २९ रन बनाइन् । उनले ३६ बलमा ३ चौका प्रहार गरिन् ।

ओपनर लक्ष्मी चौधरीले ११ रन बनाइन् । सरस्वती पुनले १७ रन बनाइन् । कमला जीएम २० रनमा नट आउट रहिन् ।

बागमतीका लागि अस्मिना कर्मचार्य र खुसी डंगोलले समान २/२ विकेट लिए । संस्कृति फुयाँल, सोनी पाख्रिन र मनिषा उपाध्यायले समान १/१ विकेट लिए ।

यसअघि टस जितेर पहिला ब्याटिङ गरेको बागमतीले निर्धारित २० ओभरमा ८ विकेट गुमाउँदै १०९ रन बनाएको थियो ।

बागमतीका लागि ओपनर हेलिशा गुरुङले निकै सम्हालिएको ब्याटिङ गरिन् । उनले ४५ बलमा ४ चौका र १ छक्कासहित ४६ रनको पारी खेलिन् ।

अन्य कुनै ब्याटरले बिचमा दोहोरो अंक जोड्न नसक्दा यशु पाण्डेले १२ रनको अविजित पारी खेलिन् ।

लुम्बिनीको लागि शर्मिला रोक्काले सर्वाधिक ३ विकेट लिइन् । मनिषा राना, कृतिका मरासिनी र मधु डिसीले समान १/१ विकेट लिए ।

प्रतियोगितामा बागमतीको याे तेस्रो जित हो भने लुम्बिनीको तेस्रो हार हो ।