नातिनीको घर पुगे प्रधानमन्त्री प्रचण्ड

११ पुस, काठमाडौं । प्रधानमन्त्री पुष्पकमल दाहाल प्रचण्ड बुधबार गोरखा पुगे । कार्यशैली बदल्छु र नगई नहुने बाहेकका कार्यक्रम जान्न भनेको भोलिपल्ट गोरखा पुगेका उनी दुईवटा सार्वजनिक कार्यक्रममा सहभागी भए ।

पहिलो थियो उनकै निर्वाचन क्षेत्रमा पर्ने बारपाक सुलिकोट गाउँपालिकाको कार्यक्रम । बारपाक सुलिकोट गाउँपालिकाले आयोजना गरेको ‘स्थानीय सरकार र सरोकारवालासँग प्रधानमन्त्री’ कार्यक्रममा उनी ११ः४५ बजे पुगेका थिए । कार्यक्रममा गण्डकीका मुख्यमन्त्री सुरेन्द्रराज पाण्डे, सामाजिक विकासमन्त्री सुशीला शिंखडालगायत पनि सहभागी भएका थिए ।

त्यसपछि दिउँसो ३ बजे उनी पुगे गोरखाकै गण्डकी गाउँपालिका–९ स्थित घ्याल्चोक ज्यामिरघाटमा ।

नेपाली सेनाको हेलिकप्टर चढेर पुगेका माओवादी केन्द्रका अध्यक्ष समेत रहेका प्रधानमन्त्री प्रचण्डलाई नातिनी प्रतिभा, ज्वाइँ विज्ञानबाबु रेग्मी र उनको परिवारले स्वागत गरे ।

प्रचण्डकी माइली छोरी रेनुकी छोरी प्रतिभा र विज्ञानबाबुबीच २९ मंसिरमा विवाह भएको थियो ।

केही दिनदेखि ज्यामिरघाटमै रहेका प्रतिभा र विज्ञानले आफ्नो गाउँमा आएका हजुरबा प्रचण्डलाई स्वागत गरेका थिए । उनीहरुले प्रचण्ड फर्किने बेलामा नेपाली सेनाको हेलिकप्टर अगाडि फोटो खिचाएका थिए ।

त्यसपछि उनले ज्यामिरघाटमा माओवादीको रुपान्तरण अभियानको कार्यक्रमलाई सम्बोधन गरे । त्यो कार्यक्रममा प्रतिभा र विज्ञानबाबु पनि सहभागी भए ।

उनले स्थानीय जनप्रतिनिधिसँग पनि अन्तर्क्रिया गरे । करिब डेढ घण्टा ज्यामिरघाटमा बसेर प्रचण्ड काठमाडौं फर्किएका थिए ।

सुरक्षा स्रोतका अनुसार प्रधानमन्त्री प्रचण्ड ३० मंसिरमा आयोजना निरीक्षण गर्न प्रधानमन्त्री ध्याल्चोक आउने भनेर गृह मन्त्रालयले सुरक्षा निकायलाई पत्र पठाएको थियो । तर प्रधानमन्त्री गएनन् ।

त्यसपछि १ पुसमा नयाँ कार्यक्रम तय भयो, ११ पुसमा प्रधानमन्त्री बारपाकमा आउने र स्थानीय सरकार तथा सरोकारवालासँग अन्तर्क्रिया गर्ने । माओवादी गोरखाका एक जिल्ला नेताका अनुसार प्रधानमन्त्री प्रचण्डको ज्यामिरघाट जाने कार्यक्रम मंगलबार मात्र तय भएको थियो ।

‘बारपाक आउने कार्यक्रम पूर्वनिर्धारित भए पनि घ्याल्चोक आउने कार्यक्रम आकस्मिक हो’, माओवादीका ती नेताले भने ।

प्रधानमन्त्रीका स्वकीय सचिव रमेश मल्लले भने प्रचण्ड पार्टीकाे कार्यक्रममा सहभागी हुने क्रममा पारिवारिक सदस्य भेट भएको भएको बताए । प्रधानमन्त्री नातिनीको  घर नगएको बरु कार्यक्रमस्थलमा उनीहरु आएका बेला तस्वीर खिचिएको उनको भनाइ छ । उनले सामान्य घटना अतिरन्जित गराइएको भन्दै ध्यानाकर्षण गराए ।